«Ես ինձ հերոս չեմ համարում». ով է Կամչատկայում հզոր երկրաշարժի ժամանակ երեխայի ծնունդն ընդունած հայ բժիշկը

Կամչատկայի տարածաշրջանային ծննդատան մանկաբարձ-գինեկոլոգ Մհեր Ադամյանը, որը 8.7 մագնիտուդ ուժգնությամբ երկրաշարժի ժամանակ երեխայի ծնունդ է ընդունել, REN TV-ի թղթակից Սերգեյ Խայդարովին ասել է, որ իրեն հերոս չի համարում, այլ պարզապես ամեն օր իր աշխատանքն է կատարում։

Հուլիսի 30-ին Կամչատկայում տեղի ունեցած հզոր երկրաշարժի ժամանակ ծննդկանը ցնցումների հետ միաժամանակ ցավեր է զգացել։ Բժիշկ Ադամյանի օգնության շնորհիվ ծնվել է առողջ աղջիկ։

«Սա մեր աշխատանքն է՝ երեխաների ծնունդ ընդունել։ Եվ նման պայմաններ Կամչատկայում հաճախ են լինում։ Մեզ մոտ անընդհատ ցնցվում է, մենք արդեն սովոր ենք դրան։  Ստիպված ենք աշխատել նման պայմաններում, բայց սա առաջին անգամն էր, որ այդքան ուժեղ երկրաշարժ եղավ այսքան տարիների ընթացքում. ես այստեղ եմ (ապրում - REN TV-ի նշում) 2011 թվականից։ Հասկանում ես, որ չես կարող վազել, պետք է մնաս կնոջ կողքին, ներկա լինես և օգնես, որքան կարող ես», - ասել է Մհեր Ադամյանը։

Մանկաբարձ-գինեկոլոգը մանրամասնել է, որ ուժեղ ցնցումների ժամանակ բոլոր մարդիկ տարհանվում են ծննդատան շենքից, բացառությամբ ծննդաբերության ակտիվ փուլում գտնվողների։ Բացի այդ, շենքում մնում են ծննդաբերություններին մասնակցող բժիշկների խմբերը։