Թրամփը կոշտ քննադատել է ԱՄՆ Ֆեդերալ ռեզերվի ղեկավարին՝ նրան անվանելով «չար և հիմար»

ԱՄՆ նախագահ Դոնալդ Թրամփը հերթական անգամ կոշտ քննադատությամբ է հանդես եկել Ֆեդերալ ռեզերվի ղեկավար Ջերոմ Փաուելի հասցեին՝ այն բանից հետո, երբ վերջինս կրկին հրաժարվել է նվազեցնել տոկոսադրույքը։ Truth Social հարթակում Թրամփը նրան անվանել է «չափազանց չար, չափազանց հիմար և չափազանց քաղաքականացված» պաշտոնյա։

Թրամփը նշել է, որ Փաուելի վարած դրամավարկային քաղաքականությունն արժեցել է ԱՄՆ-ին տրիլիոնավոր դոլարներ։ Նա նաև քննադատել է դաշնային պահուստային համակարգի շենքերի վերանորոգման ծրագիրը՝ անվանելով այն «ամենաանփույթ կամ կոռումպացված նախագծերից մեկը»։ Նախագահը վերջին շրջանում քննադատում է և՛ տոկոսադրույքների պահպանման որոշումը, և՛ ՖՌՍ-ում ծախսերի չափը։

Փաուելը, արձագանքելով քննադատությանը, ընդգծել է՝ Ֆեդերալ ռեզերվը պետք է անկախ գործի քաղաքական ճնշումներից։ Նրա խոսքով՝ առանց այդ անկախության քաղաքական գործիչները կարող են տոկոսադրույքը օգտագործել որպես ընտրությունների վրա ազդելու գործիք։