Պատուշևը նախազգուշացնում է՝ ԱՄՆ-ի և ՆԱՏՕ-ի գործողությունները կարող են սրել լարվածությունը Արկտիկայում

Ռուսաստանի նախագահի օգնական Նիկոլայ Պատուշևը հայտարարել է, որ ԱՄՆ-ի և ՆԱՏՕ-ի աճող ռազմական ակտիվությունը Արկտիկայում, ինչպես նաև ամերիկյան «նավագնացության պաշտպանության» անվան տակ իրականացվող գործողությունները, կարող են բերել անկառավարելի լարվածության։ Այս մասին հայտնում է РИА Новости-ն։

Պատուշևի խոսքով՝ Արևմուտքը չի ճանաչում Ռուսաստանի իրավունքը Հյուսիսային ծովային ճանապարհի նկատմամբ և փորձում է փոխել Արկտիկայի ռազմաքաղաքական պատկերը՝ ներգրավելով ոչ տարածաշրջանային դերակատարներին։ Նա ընդգծել է, որ նկատվում է ՆԱՏՕ-ի նավերի հաճախակի մուտք Բարենցի ծով և օդային հետախուզական թռիչքներ Ռուսաստանի ռազմաբազաների մոտ։

Ավելի վաղ ՌԴ ԱԳՆ-ում հայտարարել էին, որ ՆԱՏՕ-ն իր ռազմական ներկայությունը մեծացնելով՝ նոր սպառնալիքներ է ստեղծում Արկտիկայում։ Իսկ Պետդումայի պատգամավորները նշել էին, որ Նորվեգիայի հյուսիսում ՆԱՏՕ-ի նոր կենտրոնի ստեղծումը համարվում է դաշինքի բացահայտ ագրեսիայի նշան։