ԱՄՆ-ը նոր մաքսատուրքեր է սահմանել տասնյակ երկրների նկատմամբ

ԱՄՆ նախագահ Դոնալդ Թրամփը ստորագրել է տասնյակ երկրների համար ներմուծման մաքսատուրքեր սահմանելու գործադիր հրամանագրեր։ Այս մասին տեղեկանում ենք Սպիտակ տան կայքում տեղադրված հաղորդագրությունից։ Որոշումը կայացվել է հուլիսի 31-ի երեկոյան՝ Թրամփի՝ առևտրային համաձայնագրեր կնքելու վերջնաժամկետից մի քանի ժամ առաջ, հաղորդում է CNN-ը։

Bloomberg-ի տվյալներով՝ ԱՄՆ առևտրային գործընկերները բաժանվել են երեք խմբի։ Ապրիլից գործող 10% հիմնական սակագինը պահպանվել է երկրների մեծ մասի համար։ Այն վերաբերում է այն երկրներին, որոնց ԱՄՆ-ն ավելի շատ է արտահանում, քան ներմուծում։

15% նվազագույն սակագինը կազդի մոտ 40 երկրների վրա, որոնք ունեն աննշան առևտրային դեֆիցիտ։ Ավելի բարձր դրույքաչափեր են նախատեսված այն երկրների համար, որոնք ԱՄՆ-ի հետ համաձայնագրեր չեն կնքել կամ ունեն զգալի առևտրային դեֆիցիտ ԱՄՆ-ի օգտին։

Սպիտակ տան կողմից հրապարակված ցանկի համաձայն՝ առավելագույն մաքսատուրքեր են սահմանվել Սիրիայի (41%), Լաոսի և Մյանմայի (40%), Շվեյցարիայի (39%), Իրաքի և Սերբիայի (35%), ինչպես նաև Ալժիրի, Բոսնիա և Հերցեգովինայի, Լիբիայի և Հարավային Աֆրիկայի (30%) համար։