Մարդակեր շնաձկներ են հայտնվել Սախալինում․ հարձակվում են ձկնորսների վրա

Ռուսաստանի հեռավորարևելյան ափերին՝ մասնավորապես Սախալինի և Պրիմորյեի շրջանում, ավելացել են մեծ սպիտակ շնաձկների՝ մարդակերների ներկայության դեպքերը։ Ինչպես հաղորդում է KP.RU-ն, կենսաբանները նշում են, որ կենդանիները մոտեցել են ջրի ջերմաստիճանի բարձրացման պատճառով՝ ակտիվորեն հետապնդելով ձկնորսներին և գողանալով նրանց որսը։

Պրիմորյեում նախկինում էլ արձանագրվել են հարձակումներ մարդկանց վրա․ 2011 թվականին շնաձուկը անդամահատել էր 25-ամյա տղամարդու ձեռքերը, իսկ մեկ այլ դեպքում հարձակվել էր 16-ամյա դեռահասի վրա։

Ինչպես նշում է իխթիոլոգ Վլադիմիր Դոլգանովը, սպիտակ շնաձկները գրեթե ամեն տարի հայտնվում են այս ջրերում՝ որտեղ սննդային հիանալի միջավայր է ստեղծված։ Նրա խոսքերով․ «Ինչպես գայլը հոտի հետևից է ընկնում, այնպես էլ այս գիշատիչը հստակ հետևում է իր որսին»։

Սպիտակ շնաձկները համարվում են աշխարհում ամենավտանգավոր շնաձկների շարքում․ դրանց միջին երկարությունը հասնում է մինչև 4.8 մետրի։ Նրանցից մի մասն արդեն սկսել է մոտենալ նաև լողափերին՝ բարձրացնելով անվտանգության խնդիրները։