GHF-ի օգնության կետերը դարձել են արյունահեղ հանցագործություն. ՄԱԿ-ի նախկին պաշտոնյա

GHF-ի կողմից Գազայում համակարգվող օգնության բաշխման համակարգը վերածվել է մարդասիրական աղետի՝ զոհերի թիվը գերազանցել է 1,000-ը։ Այս մասին հայտարարել է ՄԱԿ-ի մարդասիրական հարցերով նախկին փոխքարտուղար Մարթին Գրիվիթսը՝ Al Jazeera-ին տված հարցազրույցում։

Նրա խոսքով, ծրագիրը դեռ սկզբից «զինված բնույթ» ուներ․ «Նրանք նախատեսում էին ունենալ իրենց սեփական անվտանգության ծառայություններ, տեղակայվել Իսրայելի բանակային ճամբարների հարևանությամբ։ Հիմա պարզ է, որ նրանք գործում են իսրայելական զինվորական հրահանգներով։ Այս ամենը հանցագործություն է։ Սա մարդասիրական արժեքների խոր դավաճանություն է»։

Գրիվիթսը ընդգծել է, որ չնայած ինքն ու իր գործընկերները քննադատել էին ծրագրի կառուցվածքը, չէր սպասում նման ծավալի զոհերի․ «1,000 սպանված՝ սա աներևակայելի թիվ է։ Եվ ամեն օր շարունակում է աճել։ Սա ոչ թե հիասթափություն է, այլ աղետ։ Սա մեծ մեղք է։ Սա մեծ հանցագործություն է»։