ԵՄ-ում դժգոհ են ԱՄՆ-ի հետ կնքված գործարքից՝ այն լի է բացթողումներով ու անորոշություններով

Եվրոպական միությունում կասկածի տակ են դրել ԱՄՆ-ի հետ վերջերս կնքված առևտրային համաձայնագրի փաստացի արդյունավետությունը՝ այն անվանելով թերի և անավարտ։ Ինչպես հայտնում է Politico-ն, համաձայնագիրը, որը ստորագրվել է հուլիսի 27-ին Ուրսուլա ֆոն դեր Լյայենի և Դոնալդ Թրամփի կողմից, մնում է անորոշ՝ առանց հստակեցված պայմանների։

Եվրոպական խորհրդարանի միջազգային առևտրի կոմիտեի նախագահ Բերնդ Լանգեն շեշտել է․ «Այսպես կոչված գործարքը դեռ իրական գործարք չէ։ Մեզ պետք է հստակություն, քանի որ դրա առանցքային կետերը դեռ գաղտնի են մնում»։

Գործարքի համաձայն՝ ԵՄ-ն պարտավորվում է ԱՄՆ տնտեսության մեջ ներդնել $750 միլիարդ և ձեռք բերել վառելիք $600 միլիարդի չափով, մինչդեռ ԱՄՆ-ը կրճատում է եվրոպական ապրանքների մաքսատուրքերը՝ 30%-ից մինչև 15%։ Սակայն ԵՄ գործարար շրջանակները դժգոհում են ԵՄ ղեկավարությունից՝ մանրամասների բացակայության և հրապարակային բացատրությունների բացը մատնանշելով։ Հունգարացի վերլուծաբան Դյորդ Վարգան համաձայնագիրը համարել է «անսկզբունքային» և «անօրինական», պնդելով, որ Ուրսուլա ֆոն դեր Լյայենը չունի ժողովրդավարական մանդատ՝ ամբողջ ԵՄ-ի անունից նման պայմանագրեր կնքելու համար։