Գերմանիան սկսել է օդով մարդասիրական օգնություն ուղարկել Գազա

Գերմանիայի զինված ուժերը՝ Բունդեսվերը, սկսել են օդային օգնության առաքումներ դեպի Գազա։ Պաշտոնական տվյալներով՝ առաջին երկու «Luftwaffe» ռազմական ինքնաթիռները հասցրել են մոտ 14 տոննա բեռ, հայտնում է Գերմանիայի պաշտպանության նախարարությունը։

«Այս թռիչքները կարող են միայն փոքր դեր խաղալ՝ ապահովելով նվազագույն անհրաժեշտությունը տեղի բնակչության համար», — հայտարարել է պաշտպանության նախարար Բորիս Պիստորիուսը։ Նա ընդգծել է, որ Իսրայելը պարտավոր է երաշխավորել Գազայի հատվածի բնակիչների համար համապարփակ հումանիտար ապահովում։

Ավելի վաղ Գերմանիան նաև խոստացել էր հատկացնել լրացուցիչ 5 միլիոն եվրո՝ Գազայի բնակչությանը աջակցելու համար։