Գերմանացիների մեծամասնությունը դժգոհ են Ուրսուլա ֆոն դեր Լյայենի աշխատանքից

Գերմանիայի բնակչության 51 տոկոսը բացասական է գնահատում Եվրահանձնաժողովի նախագահ Ուրսուլա ֆոն դեր Լյայենի գործունեությունը։ Այս տվյալները հրապարակել է INSA հետազոտական ինստիտուտը՝ Bild պարբերականի պատվերով։ Ըստ հարցման արդյունքների՝ միայն 31 տոկոսն է դրական գնահատում նրա աշխատանքը, իսկ 18 տոկոսը չի կողմնորոշվել։

Հարցման երկրորդ մասը վերաբերում էր ԵՄ-ԱՄՆ նոր առևտրային մաքսերին։ Հարցվածների 66 տոկոսը համոզված է, որ նոր մաքսերը վնասելու են Գերմանիայի տնտեսությանը։ Միայն 14 տոկոսն է դրական վերաբերվել այդ միջոցներին, իսկ 10 տոկոսը կարծում է, որ ազդեցություն չի լինի։

Հարցմանը մասնակցել է մոտ հազար մարդ, սակայն վիճակագրական սխալի չափը հրապարակված չէ։ Ավելի վաղ Հունգարիայի վարչապետ Վիկտոր Օրբանը քննադատել էր ԵՄ-ԱՄՆ առևտրային համաձայնագիրը՝ նշելով, որ ֆոն դեր Լյայենը ստանձնել է պարտավորություններ, որոնք դուրս են իր լիազորություններից։