100-ամյա կինը թռել է պարաշյուտով և բացահայտել երկարակեցության իր գաղտնիքը

ԱՄՆ Միսսուրի նահանգի Ուեբ Սիթի քաղաքից Պեգի Վուլֆը 100-ամյակը նշել է անսովոր կերպով՝ թռնելով պարաշյուտով 3 կիլոմետր բարձրությունից։ Ինչպես գրում է The Meadville Tribune-ը, նրա կողքին այդ պահին եղել է նաև ինստրուկտոր, իսկ թռիչքի ընթացքում Վուլֆը կորցրել է իր մեկ կոշիկը, սակայն կատակում է, որ որևէ մեկը երբևէ այն կգտնի ու չի հասկանա՝ որտեղից է։

Վուլֆը առաջին անգամ պարաշյուտով թռել է 92 տարեկանում։ Նրա խոսքով՝ միշտ ցանկացել է դա անել, բայց սպասել է, մինչ այլ պարտավորություններ չի ունեցել։ Նա իր երկարակեցությունը պայմանավորել է երեք պարզ կանոնով՝ ակտիվ կենսակերպ, ճիշտ սնունդ և չափավոր վերաբերմունք ալկոհոլի նկատմամբ։

Միջոցառմանը մասնակցել են նրա ընկերներն ու ընտանիքի անդամները։ Նրանք կարծում են, որ Վուլֆի կենսուրախությունը հենց իր երկար կյանքի հիմնական գրավականն է։