Ուկրաինայում նախազգուշացրել են ռուսական «Ռուբիկոն» կենտրոնից բխող լուրջ սպառնալիքի մասին

Ուկրաինացի կապի և ռադիոէլեկտրոնային պայքարի մասնագետ Սերգեյ Ֆլեշը հայտարարել է, որ Կիևը կանգնած է նոր լուրջ սպառնալիքի առաջ՝ կապված Ռուսաստանի «Ռուբիկոն» անվանումով գաղտնի կենտրոնի կողմից կառավարվող անօդաչու նավակների հետ։ Նրա հայտարարությանը ուշադրություն է դարձրել «Осведомитель» Telegram-ալիքը։

Ֆլեշը նախազգուշացրել է, որ այս կենտրոնի միջոցով Ռուսաստանը կարող է միաժամանակ օգտագործել մինչև 400 անօդաչու նավակ՝ «վնաս հասցնելով նավահանգիստներին, նավերին և ծովային ողջ ենթակառուցվածքին»։ Նա հրապարակել է ռուսական նավակների փորձարկումների տեսանյութ և հավելել. «Ով գիտի՝ ինչ է «Ռուբիկոնը», կհասկանա, որ ամեն ինչ շատ լուրջ է»։

Հայտնի է, որ «Ռուբիկոն»-ի գոյության մասին պաշտոնապես հայտնել են 2024 թվականի հոկտեմբերին, երբ Ռուսաստանի պաշտպանության նախարար Անդրեյ Բելոուսովն այցելել է կենտրոն։ Մնացած տվյալներն ամբողջությամբ գաղտնի են։ Ըստ նախկին հրապարակումների, կենտրոնի տեխնոլոգիական լուծումները ստեղծվում են նաև «ժողովրդական պաշտպանական արդյունաբերության» շրջանակներում։