Zara-ն հեռացրել է գովազդային լուսանկարները մոդելների գերբարակ տեսքի պատճառով

Իսպանական Zara բրենդը հեռացրել է իր ամառային հավաքածուի գովազդային լուսանկարները պաշտոնական կայքից՝ բրիտանական վերահսկող մարմնի բողոքներից հետո։ BBC-ի հաղորդմամբ՝ գովազդի կարգավորման ASA գործակալությունը հայտարարեց, որ մոդելներից մեկը չափազանց բարակ տեսք ունի՝ ընդգծված բազուկներով և ոտքերով։

Մյուս լուսանկարում մոդելն առկա էր բաց կրծքով վերնաշապիկով, ինչը նույնպես քննադատության արժանացավ՝ որպես «անառողջ մարմնի քարոզ»։ ASA-ն պահանջել է, որ բրենդը չօգտագործի նման պատկերներ, որոնք խթանում են գերբարակության իդեալը։

Zara-ն ընդունել է քննադատությունը և հեռացրել է լուսանկարները։ Ընկերության ներկայացուցիչները հայտարարել են, որ մոդելները բժշկական զննում են անցել և առողջական խնդիրներ չունեն։

Նմանատիպ միջադեպ տեղի էր ունեցել նաև փետրվարին, երբ բրիտանական Next բրենդի լեգինսների գովազդն արգելվել էր՝ մոդելի արտաքին տեսքի պատճառով։