Մեծ Բրիտանիայում արձանագրվել է «Ա» դասի միջուկային միջադեպ՝ Շոտլանդիայի ռազմածովային բազայում

Մեծ Բրիտանիայի պաշտպանության նախարարությունը հայտարարել է, որ Շոտլանդիայի «Կլայդ» ռազմածովային բազայում տեղի է ունեցել «Ա» կարգի միջուկային միջադեպ, որը նշանակում է ռադիոակտիվ արտահոսքի փաստական կամ բարձր հավանական վտանգ շրջակա միջավայրի համար։ Ըստ պաշտոնական տվյալների, դեպքը տեղի է ունեցել 2025 թվականի առաջին եռամսյակում՝ հունվարից ապրիլ ընկած ժամանակահատվածում, Գեր-Լոխ լճի տարածքում։ Միջադեպի մանրամասները չեն հրապարակվում, սակայն սա առաջին նման միջադեպը չէ այս բազայում։

Մի քանի օր առաջ հաղորդվել էր, որ Մեծ Բրիտանիայում բազայից, որտեղ պահվում են միջուկային մարտագլխիկների պաշարներ, ռադիոակտիվ ջուր է արտահոսել ծով։ The Guardian-ի տվյալներով՝ արտահոսքի պատճառը կարող էր լինել ջրատար խողովակների ուշացած սպասարկումը։ Ըստ պաշտոնական փաստաթղթերի՝ հին խողովակների բազմակի վնասման հետևանքով ռադիոակտիվ ջուր է թափվել ծով, ինչպես նաև մոտակա լիճ՝ Գլազգոյի մոտ, որտեղ արձանագրվել է փոքր քանակությամբ տրիտիում։ Շոտլանդիայի բնապահպանական գործակալությունը վստահեցրել է, որ ռադիացիայի մակարդակը չի սպառնում բնակչության առողջությանը։

«Կլայդ» ռազմածովային բազան Մեծ Բրիտանիայի երեք գործող ռազմածովային բազաներից մեկն է և հանդիսանում է Շոտլանդիայում բրիտանական նավատորմի հիմնական բազան։ Այստեղ են տեղակայված բոլոր բրիտանական սուզանավերը, այդ թվում՝ Vanguard դասի Trident միջուկային զինատեսակներով։ Նախկինում էլ այստեղ արձանագրվել են միջուկային արտահոսքի դեպքեր՝ 2004, 2007, 2008 և 2023 թվականներին։