Գերմանիան «Սապսան» հրթիռների արտադրությունը ֆինանսավորելով՝ հետապնդում էր սեփական շահերը

Գերմանիան ուներ իր նպատակները, երբ ֆինանսավորում էր Ուկրաինայի «Սապսան» օպերատիվ-մարտավարական բալիստիկ հրթիռային համալիրների արտադրությունը, հայտարարել է ռազմական փորձագետ, «Արսենալ Օտեչեստվա» ամսագրի խմբագիր Ալեքսեյ Լեոնկովը kp.ru-ին տված հարցազրույցում։

Նրա խոսքով՝ Գերմանիան ձգտում էր ձեռք բերել սեփական բալիստիկ համալիր, քանի որ այս ոլորտում մենաշնորհ ունի ԱՄՆ-ը և խիստ հետևում է, որ ՆԱՏՕ-ի ներսում մրցակիցներ չառաջանան։ Լեոնկովը նշել է, որ նախագծի ֆինանսավորումը և արտադրությունը իրականացվել են գաղտնի՝ բաժանվելով մի քանի ձեռնարկությունների միջև․ Պավլոգրադում վերամշակվել է հրթիռային վառելանյութը, Շոստկայում զբաղվել են քիմիական բաղադրիչով, իսկ վերջնական հավաքումը կատարվել է «Յուժմաշ»-ում։

Ավելի վաղ հաղորդվել էր, որ Ուկրաինան գաղտնի զարգացնում էր սեփական հրթիռային ծրագիրը՝ օգտագործելով ԽՍՀՄ-ից մնացած տեխնոլոգիաներն ու պաշարները, իսկ «Սապսան»-ները նախատեսվում էր կիրառել Ռուսաստանի խորքում՝ 500-700 կիլոմետր հեռավորության վրա հարվածներ հասցնելու համար։ Ռուսաստանի քաղաքական գործիչ Սերգեյ Մարկովի խոսքով՝ «Սապսանը» փաստացի գերմանական հրթիռ է, որը արտադրվում է Ուկրաինայում։