Օվերչուկն ադրբեջանական կողմի հետ կքննարկի տրանսպորտային հաղորդակցությունների ապաշրջափակման հարցը

Ռուսաստանի փոխվարչապետ Ալեքսեյ Օվերչուկը լրագրողներին հայտնել է, որ հաջորդ շաբաթ ադրբեջանական կողմի հետ կքննարկի Հարավային Կովկասում տրանսպորտային հաղորդակցությունների ապաշրջափակման հարցը։

«Ես նաև հանդիպում ունեմ ադրբեջանական կողմի հետ հաջորդ շաբաթվա վերջին։ Մենք կքննարկենք այդ հարցերը [Հարավային Կովկասում տրանսպորտային հաղորդակցությունների ապաշրջափակումը]։ Այսպիսով, շարժ կա», - ասել է նա։

«Դա կլինի Ռուսաստանում», - պատասխանել է Օվերչուկը հանդիպման վայրի մասին հարցին։

Փոխվարչապետը նշել է, որ Ադրբեջանի, Հայաստանի և Ռուսաստանի փոխվարչապետերի մակարդակով գործում է եռակողմ աշխատանքային խումբ, որն աշխատում է Ռուսաստանի Դաշնության, Ադրբեջանի և Հայաստանի ղեկավարների եռակողմ հռչակագրի իններորդ կետի իրականացման վրա և մանրամասն քննարկել է ապաշրջափակման բոլոր նրբությունները։

«Հետևաբար, իհարկե, մեզ հետաքրքրում է իմանալ, թե որքանով են կողմերը առաջ շարժվել եռակողմ աշխատանքային խմբի շրջանակներում քննարկված հարցերի լուծման հարցում: Որոշ նրբություններ ազդում են Ռուսաստանի Դաշնության շահերի վրա Հարավային Կովկասում, առաջին հերթին՝ երկաթուղային հաղորդակցության զարգացման առումով: Հետևաբար, մեզ համար շատ հետաքրքիր կլինի լսել, թե արդյոք լուծումներ են գտնվել այդ նրբությունների հետ կապված», - ընդգծել է նա։