Պատկերներ գագաթից․ Նագովիցինան՝ վնասվածքով և անօգնական վիճակում

Ցանցում հայտնվել են լուսանկարներ ռուսաստանցի ալպինիստուհի Նատալյա Նագովիցինայի, որը օգոստոսի 12-ից մնացել էր Պիկ Պոբեդա լեռան վրա՝ կոտրված ոտքով։ REN TV-ի հրապարակած կադրերում երևում է, թե ինչպես նրա վնասված վերջույթը ամրացված է վրանային ձողի օգնությամբ։ Կողքին նստած է իտալացի Լուկա Սինիգալյան, որը հետագայում զոհվել է՝ փորձելով փրկել Նագովիցինային։

Այլ լուսանկարներում երևում են խմբի մյուս անդամները՝ գերմանացի Գյունտեր Զիգմունդն ու ռուսաստանցի Ռոման Մոկրինսկին, որը առաջին օգնություն է ցուցաբերել Նագովիցինային։ Տարածված կադրերից մեկում էլ երևում է նրանց պատռված վրանն՝ անողոք լեռան գագաթին։

Հիշեցնենք, որ Նագովիցինան գտնվում էր 7 հազար մետր բարձրության վրա և ավելի քան երկու շաբաթ չկարողացավ իջնել լեռից։ Օգոստոսի 23-ին հայտարարվեց նրա փրկարարական գործողության ավարտի մասին, իսկ օգոստոսի 27-ին անցկացված օդային հետախուզությունը չհայտնաբերեց կյանքի որևէ նշան։