Նոր Նորքի 5-րդ զանգվածում շինթույլտվության հարցն օրակարգից հանվեց, բայց բնակիչների բողոքը շարունակվում է

Այսօր նախատեսված ավագանու նիստում օրակարգից հանվել է Նոր Նորքի 5-րդ զանգվածում նախատեսված 18 հարկանի շենքի շինթույլտվության նախագիծը, որի շուրջ բնակիչները բողոքի ակցիա են իրականացրել։ «Հանրապետություն» խմբակցության ավագանու անդամ  Անի Խաչատրյանը պարզաբանեց, որ իրենք իրենց կարծիքին են մնում և դեմ են շենքի կառուցմանը, և վարչական շրջանում ներկայացված առաջարկով նախագիծը հանվել է օրակարգից։

Արթուր Չախոյանի փոխանցմամբ՝ բնակիչները իրենց հաղթանակ չեն համարում, քանի որ նախագծի օրակարգից հանվելը չի նշանակում շենքի կառուցման թույլտվության չտրամադրում։ Բնակիչները պահանջում են, որ Տիգրան Ավինյանը անձամբ հանդիպի իրենց հետ, երաշխիք տա և կառուցապատողի հետ համաձայնության հասնի՝ պահպանելով 2007-ին Նոր Նորքում վերջինիս կողմից օտարած այգու տարածքը որպես խաղահրապարակ։ Օրակարգից հանվելը վարչական գործընթացի մաս է կազմում, սակայն շինթույլտվության տրամադրումը դեռևս չի դադարեցվել, և բնակիչները մտահոգ են տարածքի պահպանության հարցով։