Սվետլանա Ժուրովան ահազանգել է՝ ռուսական սպորտը բախվել է ֆինանսավորման լուրջ խնդիրների

Ռուսաստանի Պետդումայի պատգամավոր և օլիմպիական չեմպիոն Սվետլանա Ժուրովան հայտնել է, որ երկրում սպորտի ֆինանսավորումը լուրջ դժվարությունների առաջ է կանգնած։ Նրա խոսքով՝ հատկապես վտանգված են երիտասարդ մարզիկները, որոնք դեռ չեն հասել մեծ հաջողությունների և հաճախ մտածում են արտասահման մեկնելու մասին։

Ժուրովան նշել է, որ Ռուսաստանում կան մարդիկ, ովքեր դեմ են բարձրագույն սպորտի ֆինանսավորմանը, սակայն դա, իր կարծիքով, կործանարար մոտեցում է․ «Եթե մենք չունենանք բարձրակարգ սպորտ, ապա ինչո՞ւ է պետք մանկականը։ Երեխաները մեծանում են՝ ցանկանալով դառնալ պրոֆեսիոնալ մարզիկներ», — ընդգծել է նա։

Պատգամավորն ավելի վաղ նույնպես հանդես էր եկել ռուս մարզիկների աջակցության օգտին՝ օրինակ բերելով հոքեյիստ Ալեքսանդր Օվեչկինին, որին նա համեմատել էր լեգենդար գեղասահորդուհի Իրինա Ռոդնինայի հետ՝ ընդգծելով նրանց ունեցած ազդեցությունը ռուսական սպորտի հեղինակության վրա։