Միքայել Ոսկանյան՝ թառի մերօրյա պաշտպանը

Ցանկացած երաժշտական գործիք մեծ կարևորություն ունի տվյալ ժողովրդի ինքության պահպանման գործում: Հայաստանը, որն անըդհատ ենթարկվում է հարևան պետության կողմից երաժշտական գործիքները, ուտեստները, երաժշտությունը իրենց վերագրելու վտանգին, պետք է համախմբվի՝ հայկականը պահպանելու և ի լուր աշխարհին ցուցադրելու համար:

Նմանատիպ խնդրի առաջ է կանգնած նաև ազգային նվագարաններից թառը: Առավել ևս, երբ ՅՈՒՆԵՍԿՈ-ն թառի կատարողական արվեստն ընդգրկել է ոչ նյութական արժեքների ներկայացուցչական ցուցակի շարքում՝ հանձին ադրբեջանական կատարողների արվեստի: Եթե հաշվի առնենք այն, որ իրանցիները նույնպես պնդում են, որ այս նվագարանն իրանական ծագում ունի, կարելի է վստահությամբ ասել, որ խնդիրը հասել է իր գագաթնակետին և անհապաղ լուծում է պահանջում:

Armstar.am-ը զրուցեց թառ ժողովրդական գործիքի պահպանման և տարածման գործում այսօր մեծ ներդրում ունեցող թառահար, երաժիշտ, երգահան Միքայել Ոսկանյանի հետ: Ի դեպ, այս օրերին տաղանդաշատ թառահարը մասնակցում է Օդեսսայում տեղի ունեցող ջազ իմպրովիզատորների միջազգային մրցույթ փառատոնին, որտեղ մասնակցում են ինչպես ճանաչված, այնպես էլ սկսնակ, բայց տաղանդավոր երաժիշտներ 34 երկրից: Միքայելը հաղթահարել է մրցույթի առաջին փուլը: Այժմ online քվերակությամբ ընթանում է երկրորդ փուլը, որտեղ կարող եք Ձեր ձայնը տալ Հայաստանը ներկայացնող մեր մասնակցին՝ անցնելով հղումով:

-Ինչպե՞ս որոշեցիք մասնակցել մրցույթին և, ի վերջո, ի՞նչ կտա հաղթանակը:

-Իրենց ներկայացուցիչների առաջարկով ես ևս գրանցվեցի էթնիկ երաժշտական գործիքների կատեգորիայում: Ինձ համար այժմ չափազանց կարևոր է վերջին փուլին մասնակցելը, քանի որ թառ գործիքն առաջին անգամ կմասնակցի ջազ փառատոնին: Շատ կարևոր է նաև, որ մասնակիցը Հայաստանից է՝ հաշվի առնելով ադրբեջանցիների վերջին նկատառումները թառի վերաբերյալ:

-Ի՞նչ միջոցներ եք ձեռնարկում՝ թառ երաժշտական գործիքն ոչնչացման եզրից ետ բերելու համար:

-Կարելի է ասել, որ այսօր վտանգված են բոլոր ազգային նվագարաններն ու հատկապես լարային գործիքները: Ես, բոլորից անկախ, իմ գործն եմ անում' հնարավորինս շատ նվագելով և ստեղծագործելով: Նշեմ, որ թառը շատ լավ ընդունվեց, երբ սկսեց հնչել իր դասական հնչերանգից մի փոքր տարբերվող ձևով, մասնավորապես՝ ջազզային ոճում: Հատկապես ուրախալի է, որ երիտասարդությունը սկսեց հետաքրքրվել ու սիրել և՛ գործիքը: Այսօր ես ունեմ իմ բենդը, հանդես ենք գալիս “Miqayel Voskanyan&Friends” անվամբ, փորձում ենք նվագել այնպիսի վայրերում, որտեղ երիտասարդները կարող են լսել ու, ցավով եմ ասում, ծանոթանալ թառի հետ: Այո, շատերն անգամ չգիտեն, թե դա ինչ գործիք է, սակայն երբ լսում են, սկսում են հետաքրքրվել, համացանցում ավելանում է դիտումների քանակը և այլն: Դրանից հետո կարելի է արդեն ունկնդրին մոտեցնել ու ծանոթացնել նաև գործիքի արմատներին: Ինչ վերաբերում է ադրբեջանցիներին՝ կցանկանայի հիշեցնել, որ անցած դարի սկզբին Բաքվի թառի կատարողական դպրոցը հիմնադրել է մեր հանրահռչակ ու մեծագույն թառահար Սողոմոն Սեյրանյանը:

-Ուզում էիք նաև վավերագրական ֆիլմ նկարահանել: Դիմեցի՞ք մշակույթի նախարարություն:

-Առայժմ նախնական փուլում է այդ ծրագիրը: Սցենարի և այլ հարցերի հետ կապված դեռ աշխատանքներ կան: Իսկ մշակույթի նախարարություն չեմ դիմել, անկեղծ ասեմ՝ առանձնապես մեծ հույսեր չեմ ակնկալում: Ավելի շատ հիմնվում եմ սեփական ուժերիս վրա: Վերջերս մի քանի ֆիլմեր արտադրվեցին՝ նվիրված ազգային նվագարաններին, բայց զարմանալի կերպով, թառի մասին դեռևս լռում են: Կարծում եմ' դուդուկի ու քամանչայի կողքին անպայման պետք էր նաև թառի մասին ֆիլմ նկարահանել:

-Նաև երգահան եք: Ու՞մ հետ եք համագործակցել:

-Ունեմ 100-ից ավելի երգեր, որոնց մեծ մասը դեռևս չեն կատարվել: Աշխատել եմ շատ երգիչ-երգչուհիների հետ՝ Գոհար Հովհաննիսյան, Արսեն Գրիգորյան (Մրրո), Արսեն Գրիգորյան (Ասո), Արսեն Գրիգորյան (դերասան), Արսեն Հայրապետյան, Ռուբեն Սասունցի, Մագա, Եվա Թաշչյան, Սոնիա և այլք: Որպես երաժիշտ՝ մասնակցել եմ շոու-բիզնեսի գրեթե բոլոր ներկայացուցիչների ձայնագրություններին:

-Որտեղ կարելի է ունկնդրել Ձեր կատարումները:

-Երևանի գրեթե բոլոր ակումբներում և փաբերում նվագում ենք: Համացանցում մեր համերգների վերաբերյալ միշտ տեղեկատվություն է տեղադրում: Բացի “Miqayel Voskanyan&Friends”-ից նվագում եմ նաև “Los Locos” ֆլամենկո խմբում, հանդես ենք գալիս “Los Locos with Miqayel Voskanyan” նախագծով: Պարբերաբար ելույթներ ենք ունենում, օրինակ, “Miq’s Art Acoustic Band”-ով արտասահմանցի երաժիշտների հետ միասին նվագել ենք 2011-2012 թվականների Europe Day միջոցառումներին: Օգոստոսին մասնակցել ենք Ֆինլանդիայում կազմակերպված “Voices of Peace Project” հանուն խաղաղությանը նվիրված համերգին և այլն: