Իշխանությունը գիտի՝ չի հաղթել, դրա համար էլ ռեպրեսիաները շարունակվում են․ Գագիկ Համբարյան

ՀՀ ԱԺ ընտրություններն ավարտվել են, 9-րդ գումարման Ազգային ժողովն արդեն ձևավորված է, սակայն քաղաքական կրքերն ամբողջ հանրապետությունում, մասնավորապես՝ Երևանում և հայրաքաղաքում չեն հանդարտվում․ այս ամենի համատեքստում հարցեր են առաջանում՝ արդյոք ընտրություններից հետո քաղաքական հաշվեհարդարը շարունակվում է։

Գյումրեցի քաղաքագետ Գագիկ Համբարյանը համոզված է՝ Գյումրիում տեղի ունեցողը պատահականություն չէ։ Նրա գնահատմամբ՝ իշխանությունը փորձում է հասարակության մեջ ամրապնդել այն թեզը, թե ընդդիմության ստացած բոլոր ձայները ընտրակաշառքի հետևանքներն են։

«Այս ամենի պատճառով էլ, նույնիսկ սովորական հեռախոսազանգերը, փորձում են ներկայացնել որպես հանցագործության ապացույց։

Օրինակ՝ մարդը զանգել, ասել է՝ ուզում է հանձնաժողովի անդամ դառնալ ու դա ներկայացվում է որպես ընտրակաշառքի կազմակերպում։ Սա քաղաքական պատվեր է, ոչ թե իրավական գործընթաց»,- ասում է նա։ Քաղաքագետը կասկածի տակ դրեց նաև ընտրությունների արդյունքների լեգիտիմությունը՝ հիշեցնելով, որ Նիկոլ Փաշինյանը նախընտրական շրջանում հայտարարել էր, թե ժողովրդի լիարժեք վստահության մասին հնարավոր կլինի խոսել միայն այն դեպքում, եթե ստանա 50+1 տոկոս քվե։

«Նույնիսկ ԿԸՀ-ի հրապարակած թվերով Փաշինյանը ստացավ 49,7 տոկոս քվե։ Այսինքն՝ անգամ այդ արդյունքներով չի ստացել 50 տոկոսից ավելի աջակցություն։

Եթե Հայաստանը դասական ժողովրդավարական երկիր լիներ, ապա նման արդյունքով կառավարություն ձևավորելը պարզապես անհնար կլիներ»,- ասաց Համբարյանը։ Նրա խոսքով՝ ընդդիմության նկատմամբ շարունակվող քրեական գործերն ունեն երկու հիմնական նպատակ՝ հանրությանը համոզել, թե ընդդիմությունն ամբողջությամբ զբաղվել է ընտրակաշառքով, և միաժամանակ վախի մթնոլորտ ստեղծել։ «Ես էլ ընդդիմադիր հայացքներ ունեմ։ Թող ապացուցեն, որ երբևէ ընտրակաշառք եմ տվել։ Չեն կարող, որովհետև նման բան չկա։

Այս ամենը քաղաքական հետապնդում է»,- շեշտեց նա։ Համբարյանը համոզված է՝ հատկապես Շիրակի մարզում իրավապահ համակարգը դարձել է իշխանության քաղաքական կամքը սպասարկող գործիք։ Ընդգծեց՝ որքան էլ Գյումրին շարունակի պահպանել իր ընդդիմադիր կեցվածքն, իրավապահ համակարգը այնտեղ՝ Շիրակի մարզում, զբաղված է քաղաքական պատվերներ կատարելով։ Սա վաղուց արդեն իրավական գործընթաց չէ։ Նա նաև հայտարարեց՝ ինքը ևս թիրախավորված է ՀՀ իշխանությունների կողմից։ «Այս պահին իմ նկատմամբ էլ են գործ սարքում։

Ընդ որում՝ գործը կառուցված է ընդամենը մեկ անձի ցուցմունքի վրա։ Ո՛չ ինձ են պատշաճ հարցաքննել, ո՛չ էլ այն մարդկանց, որոնք կարող էին պարզաբանումներ տալ։ Փաստաբանիս հետ հիմա փորձում ենք հասկանալ՝ ինչ մեղադրանքներ են պատրաստվում առաջադրել»,- ասաց Համբարյանը։

Խոսելով նոր ձևավորված խորհրդարանի մասին՝ քաղաքագետը նկատեց, որ 9-րդ գումարման Ազգային ժողովը լեգիտիմ չի համարում։ Նա հիշեցրեց հատկապես ԲՀԿ-ի շուրջ կատարվածը՝ վկայակոչելով հասարակական գործիչ Դանիել Իոաննիսյանի հրապարակած հաշվարկները։

«Եթե այն ընտրատեղամասերի ձայները, որտեղ ընտրությունները չեղարկվել էին, հաշվարկվեին ընդհանուր արդյունքներում, ԲՀԿ-ն կհաղթահարեր անցողիկ շեմը և կմտներ խորհրդարան։ Այդ հաշվարկները հրապարակվել են, և դրանք լուրջ հարցեր են առաջացնում ընտրությունների արդյունքների վերաբերյալ»,- նկատեց նա։ Համբարյանի գնահատմամբ՝ իշխանությունն ընտրությունների ընթացքում լայնորեն օգտագործել է նաև վարչական ռեսուրսը՝ սոցիալական ծրագրերը ծառայեցնելով քաղաքական նպատակների։

«Մի քանի ամիս առաջ իշխանությունը հայտարարում էր, թե նույնիսկ հազար դրամով կենսաթոշակի բարձրացումը ծանր բեռ է բյուջեի համար, իսկ ընտրություններից անմիջապես առաջ արդեն հնարավոր դարձավ 10․000 դրամով բարձրացնել թոշակները։ Սա, իմ գնահատմամբ, նախընտրական քաղաքական տեխնոլոգիա էր»,- եզրափակեց քաղաքագետը։