Անահիտ Ավանեսյանը շարունակում է «լավ աչքով» նայել Սամվել Ալեքսանյանին

Վերլուծական 21 Օգոստոս, 2023 21:22

Անահիտ Ավանեսյանը շարունակում է «լավ աչքով» նայել Սամվել Ալեքսանյանին

Ամիսներ առաջ կառավարության նիստի ընթացքում վարչապետի ու առողջապահության նախարար Անահիտ Ավանեսյանի կողմից գովազդվեց Սամվել Ալեքսանյանին պատկանող «Աստղիկ» բժշկական կենտրոնը։ Վարչապետ Նիկոլ Փաշինյանն էլ խոստովանեց, որ այդ հարցի բարձրաձայնումը, ըստ էության, մասնավոր ընկերության գովազդ է, սակայն գովազդային հոլովակի գլխավոր դերում Անահիտ Ավանեսյանն էր։

Դրանով, սակայն, ամեն բան չավարտվեց: 2021 թվականին «Նատալի ֆարմ» ՍՊԸ-ում արձանագրված 1 մլրդ դրամի խախտումը 1,5 տարի որևէ ընթացք չի ստացել: ՊՎԾ-ից հայտնում են, որ վարչապետի կողմից առողջապահության նախարարին տրված հանձնարարականի հիման վրա Երևանի մի շարք բժշկական կենտրոններում, այդ թվում՝ «Նատալի ֆարմ» ՍՊԸ, «Աստղիկ» բժշկական կենտրոնում անցկացվել է ուսումնասիրություն, սակայն նաև ավելացրել էին, որ խախտումների և դրանց հնարավոր ֆինասական հետևանքների մասին պաշտոնական տեղեկություն տրամադրելը նպատակահարմար չեն համարում:

Ստացվում է, որ «Աստղիկ» ԲԿ-ում եղել է ստուգում, որի արդյունքում, ըստ որոշ տեղեկությունների, արձանագրվել է 1 մլրդ դրամի խախտում: Այս խախտմանը որոշ ժամանակ որևէ ընթացք չի տրվել, ապա ստուգումներ անցկացնելու մասին հրամանն անվավեր է ճանաչվել:

Անահիտ Ավանեսյանը հեռակա կապ ունի «Նատալի ֆարմի» և «Աստղիկ» ԲԿ-ի սեփականատեր Սամվել Ալեքսանյանի հետ: Մինչև փոխնախարար նշանակվելը վերջինս հանդիսացել է «Աբովյան 39» ՍՊԸ տնօրեն, և հենց վերջինիս կողմից է կնքվել ընկերության տարածքը «Նատալի ֆարմ» ՍՊԸ-ին վարձակալությամբ հանձնելու պայմանագիրը: Այժմ էլ ստացվում է, որ նախարարն ինքը հրաման է ստորագրում, ինքն էլ չեղարկում, իսկ թե ինչի արդյունքում է այդ հրամանը չեղարկվել, իհարկե, հայտնի չէ: Զարմանալի է, թե ուր են նայում այս դեպքում ՊՎԾ-ն և Հակակոռուպցիոն կոմիտեն...