Բժիշկ-դիետոլոգը հորդորում է Մեծ պահքը դիետայի հետ չնույնացնել

Մեծ պահքի մասին խոսելը դիետոլոգի իրավասության շրջանակում չէ, նախընտրելի է, որ մարդիկ Մեծ պահքի ընթացքի մասին զրուցեն քահանայի կամ եկեղեցու այլ ներկայացուցչի հետ: Մարտի 11-ին հրավիրված ասուլիսում ՀՀ առողջապահության նախարարության Կուրորտաբանության ու ֆիզիկական բժշկության ինստիտուտի բժիշկ-դիետոլոգ Վարդանուշ Պետրոսյանը բնակչությանը հորդորեց ևս մեկ անգամ հիշել, որ Մեծ պահքն, ի տարբերություն դիետայի, հետապնդում է նաև հոգևոր խնդիր:

«Իհարկե, պահքի ժամանակ կան սննդային սահմանափակումներ, սակայն այն ապաշխարելու, կամքն ուժեղացնելու, ոչ թե նիհարելու համար է»,- հիշեցրեց Պետրոսյանը:

Նրա գնահատմամբ` Մեծ պահքը նիհարելու հետ որևէ կերպ չի կարող առնչվել:

«Գովելի է, որ պահքն ինչ-որ ձևով մտնում է կենցաղ, սակայն անհրաժեշտ է ուշադրություն դարձնել հոգևոր կողմին»,- ընդգծեց մասնագետը' ավելացնելով, որ պահք պահել չի թույլատրվում երեխաներին, ծերերին, կերակրող մայրերին և հղիներին:

ՀՀ առողջապահության նախարարության Կուրորտաբանության ու ֆիզիկական բժշկության ինստիտուտի բժիշկ-դիետոլոգը նշեց, որ դիետոլոգիական տեսանկյունից բուսակերությունն ունի իր դրական և բացասական կողմերը: Կենդանական ճարպերը հանգեցնում են սրտանոթային հիվանդությունների, մինչդեռ բուսական սննունդը հարուստ է բջջանյութով: Բացասականն այն է, որ առանց կենդանական կանոնակարգված սննդի հնարավոր չէ ստանալ լիարժեք սնունդ, և մարդու օրգանիզմից պահքի շրջանում հատկապես պակասում են կալցիումը և երկաթը:

Անդրադառնալով ծոմապահությանը' բանախոսը նշեց, որ այն իրականում նիհարելու, օրգանիզմը մաքրելու եղանակ է, որը, սակայն, պետք է իրականացնել բժիշկի հսկողությամբ:

Խոսելով դիետաների մասին' Պետրոսյանը ևս մեկ անգամ հիշեցրեց, որ դիետան ենթադրում է ճիշտ սննդակարգ, առողջ ապրելակերպ, ֆիզիկական ակտիվություն:

«Հաճախ նրանք, ովքեր որոշում են նիհարել, սխալ տեղեկատվություն են ընտրում»,- փաստեց բժիշկ-դիետոլոգը' վստահեցնելով, որ հարևանի դիետան չի կարող համապատասպանել յուրաքանչյուրին, որովհետև այն պետք է լինի անհատական և հարմարեցված տվյալ մարդու օրգանիզմին:

Այս տարի Մեծ պահքն սկսվել է մարտի 3-ին, իսկ Սուրբ Հարության տոնը կնշվի ապրիլի 20-ին: Մեծ պահքը տևում է 48 օր' Բուն Բարեկենդանից մինչև Սուրբ Հարության (Զատկի) տոնի նախօրեն:

Մեծ պահքի շրջանում օգտագործվում է բացառապես բուսական ծագում ունեցող սննդամթերք (բացառությամբ' մեղրի), որը ենթադրում է «համեստ» սնունդ, ինքնազսպում զանազան ճոխ և համադամ կերակուրներից, ոգելից խմիչքներից: Պահքի գլխավոր նպատակը մարդկանց մեղքերից մաքրագործելն է, շատ կարևոր է պահեցողության ընթացքում նաև եկեղեցական պատարագներին և ժամերգություններին մասնակցելը, աղոթելը, բարին արարելը և միմյանց ներելը: