«Անահիտ» մուլտֆիլմը տոներին ընդառաջ նվեր է փոքրիկներին և մեծերին

Բազմաթիվ կինոսերներ, երկար տարիներ անհամբեր սպասելուց հետո, վերջապես հնարավորություն ստացան մասնակցելու «Անահիտ» լիամետրաժ մուլտիպլիկացիոն ֆիլմի պրեմիերային: Ղազարոս Աղայանի ստեղծագործության առաջին անիմացիոն էկրանավորման պրեմիերան տեղի ունեցավ դեկտեմբերի 27-ին «Մոսկվա» կինոթատրոնում: Նկարչական ավանդական մուլտիպլիկացիոն տեխնոլոգիայով և եռաչափ գրաֆիկայի կիրառմամբ ստեղծված կինոնկարն անտարբեր չթողեց թե՛ մեծահասակ և թե՛ փոքրիկ հանդիսատեսներին: Մուլտֆիլմը ստեղծողների և կինոսերների մոտ 5 տարի փայփայած երազանքն իրականություն դարձավ:

Մուլտֆիլմի ռեժիսոր Դավիթ Սահակյանցը լրագրողների հետ զրույցում նշեց, որ ֆիլմը ներկայացվելու է միջազգային հանրությանը:

«Ֆիլմը մասնակցելու է մի շարք փառատոնների, թարգմանվելու է մի քանի լեզվով: Արդեն իսկ կան ռուսերեն և անգլերեն տեքստերը: Դերասանները սկզբում տեսել էին իրենց հերոսների էսքիզները և մոտավորապես գիտեին, թե նրանք ինչ արտաքին ունեն»,- «Արմենպրես»-ի փոխանցմամբ՝ նշեց Դավիթ Սահակյանցը: Մուլտիպլիկացիոն կինոնկարում կան նաև ժամանակակից տարրեր՝ համակարգիչ, հեռախոս, մետրո, անգամ Կոնչիտա Վյուրստն է ներկա «Անահիտ»-ում:

Սահակյանցի խոսքով՝ մուլտֆիլմում արծարծվում է իդեալական պետություն ունենալու երազանքը:

Ֆիլմի պրոդյուսերը' «Շարմ հոլդինգի» գլխավոր տնօրեն Կարեն Ղազարյանն ընդգծեց, որ կինոնկարը նվիրված է Ղազարոս Աղայանի հոբելյանին:

«Ցանկացած հեքիաթ իր մեջ քաղաքական ենթատեքստ ունի, այն խնդիրներ է բարձրացնում, որոնք նորմալ են ցանկացած իշխանության համար՝ ցանկացած ժամանակահատվածում: Հեքիաթը դրա համար էլ հեքիաթ է, որ այն դիտեն և որոշ բաներ սովորեն: Ինչպես մեծերը, այնպես էլ երեխաները»,- նշեց նա:

Դերասանուհի Նազենի Հովհաննիսյանը մուլտիպլիկացիոն ֆիլմում հնչյունավորել է Անահիտին: «Ահռելի աշխատանք է արվել, որի մեջ մենք ընդամենը մի փոքր բան ենք ներդրել: Երբ առաջին անգամ մեզնից յուրաքանչյուրը վերցրեց տեքստը և փորձեց կարդալ, դեռևս չկային կերպարներ, կային նախնական էսքիզները: Եվ մենք փորձել ենք հասկանալ, թե ինչ կարող է դառնալ այս կերպարը: Իմ կերպարը և ես նմանություններ ունենք: Այն, ինչ տեսանք, ապշեցուցիչ է, ֆանտաստիկ, զարմանալի»,- նշեց Նազենի Հովհաննիսյանը:

Ինչպես ցանկացած հեքիաթի, այնպես էլ «Անահիտ»-ի հիմքում չարի և բարու հավերժական պայքարն է: Այս հեքիաթի չարագործները Վաչագան թագավորի հորեղբայր Ազարն ու նրա ծառա Էնվերն են: Հերոսներից են խենթ գուշակ Պետրոսը, կախարդական աղբյուրից ծնունդ առած Անդոկ ձին և Զանգի շունը: Գլխավոր հերոսների ուսուցիչներն են Շուշանն ու Սերոբը: Ֆիլմի երկխոսությունները գրվել են բանաստեղծական ոճով:

«Անահիտ» մուլտֆիլմի հերոսներին հնչյունավորել են Նազենի Հովհաննիսյանը, Խորեն Լևոնյանը, Հրանտ Թոխատյանը, Ռաֆայել Քոթանջյանը, Շուշան Պետրոսյանը, Մկրտիչ Արզումանյանը, Դավիթ Բաբայանը, Վարդան Զադոյանը: Մուլտֆիլմի կոմպոզիտորներն են Արմեն Մարտիրոսյանը և Վարդան Զադոյանը: Երգերը կատարում են Շուշան Պետրոսյանը, Ինգա Արշակյանը, Տիգրան Պետրոսյանը, Գոռ Սուջյանը, Նիկ Էգիբյանը, Հասմիկ Կարապետյանը, ինչպես նաև «Ակունք» ազգագրական համույթը:

Ռեժիսորներն են Դավիթ Սահակյանցն ու Լյուլյա Սահակյանցը: Պրոդյուսերական աշխատանքներով զբաղվել է «Շարմ» հոլդինգը: Սցենարի հեղինակներն են Նաիրա Սահակյանցը, Լյուլյա Սահակյանցն ու Դավիթ Սահակյանցը, երկխոսությունների հեղինակներն են Վահրամ Սահակյանն ու Լևոն Գալստյանը: Մուլտֆիլմի բեմադրող նկարիչն Էռնեստ Մուրադյանն է, իսկ կոմպոզիտորներն են Արմեն Մարտիրոսյանը և Վարդան Զադոյանը:

Երևանյան պրեմիերայից հետո «Դիսնեյի» չափանիշներին համապատասխանող «Անահիտ» մուլտֆիլմը ցուցադրվելու է միջազգային հեղինակավոր փառատոններում: