Շտապօգնության բժիշկներին թույլ չեն տվել ՔԿՀ-ում տեսակցել Վարդան Ղուկասյանին. պաշտպանը դիմել է ՄԻՊ-ին

Գյումրու քաղաքապետ Վարդան Ղուկասյանին, չնայած առողջական առկա խնդիրներին, այսօր տեղափոխել են «Երևան-Կենտրոն» ՔԿՀ։ Պաշտպան Զարուհի Փոստանջյանի կանչով ՔԿՀ ժամանած շտապօգնության բժիշկներին թույլ չեն տվել մուտք գործել հիմնարկի տարածք ու հետազոտել Վ. Ղուկասյանին։ Զարուհի Փոստանջյանը քիչ առաջ հրապարակել է հանցանքների մասին հաղորդում՝ ուղղված ՄԻՊ-ին ու գլխավոր դատախազին.

«Հանցագործության մասին սույն հաղորդումը ներկայացնում եմ որպես Գյումրիի ընտրված քաղաքապետ, պարոն Վարդան Ղուկասյանի պաշտպան, ով ներկայումս գտնվում է կալանքի տակ՝ ՀՀ արդարադատության նախարարության «Երևան–Կենտրոն» քրեակատարողական հիմնարկում։

Մինչ օրս Ձեզ ներկայացրել եմ հանցագործության մասին բազմաթիվ հաղորդումներ և պաշտոնական դիմումներ՝ կապված «Երևան–Կենտրոն» քրեակատարողական հիմնարկում առկա իրավիճակի, մասնավորապես՝ Վարդան Ղուկասյանին բժշկական օգնություն չտրամադրելու փաստերի վերաբերյալ։ Սակայն մինչ այս պահը որևէ պատասխան չի տրամադրվել, և որևէ քրեական վարույթ չի նախաձեռնվել։ Արձանագրում եմ, որ երեկ ներկայացված վերջին հաղորդումը ևս մնացել է անարձագանք։

Այսօր՝ մոտավորապես ժամը 14:00-ին, Վարդան Ղուկասյանին այցելելու ընթացքում ես անձամբ արձանագրեցի, որ նրա առողջական վիճակը էականորեն վատթարացել է։ Վարդան Ղուկասյանը բողոքեց ականջներում աղմուկից, կրծքավանդակի շրջանում մշտական ցավերից, ինչպես նաև քաշի կտրուկ նվազումից, ինչը արդեն ակնհայտ տեսանելի է։ Նա ուներ գունատ տեսք և արտահայտված ֆիզիկական թուլություն։

Տվյալ իրավիճակում ես անհապաղ պահանջեցի հրավիրել քրեակատարողական հիմնարկի բժշկին՝ պարոն Ղուկասյանին զննելու նպատակով։ Ինձ տեղեկացրին, որ բժիշկ տեղում չկա։ Դրանից հետո ես խնդրեցի, որպեսզի գոնե որևէ բուժքույր ներկայանա և զննի Վարդան Ղուկասյանին, սակայն այդ խնդրանքն ուղղակիորեն մերժվեց։

Արդյունքում՝ ոչ մի բժշկական օգնություն չի տրամադրվել ակնհայտորեն վատառողջ անձին, այն դեպքում, երբ նա հանդիսանում է ազատությունից զրկված անձ և գտնվում է պետության անմիջական վերահսկողության և պատասխանատվության ներքո։

Ստեղծված իրավիճակում ես ստիպված եղա դուրս գալ քրեակատարողական հիմնարկից, որպեսզի շտապօգնություն կանչեմ, ինչպես նաև հանցագործության մասին հաղորդում ներկայացնեմ՝ ազատությունից զրկված անձին օգնություն չտրամադրելու փաստի կապակցությամբ։ Շտապօգնությունը ժամանեց մոտավորապես ժամը 15:10-ին, սակայն շտապօգնության բժշկին չթույլատրեցին մուտք գործել քրեակատարողական հիմնարկ, ինչի արդյունքում անհնար դարձավ Վարդան Ղուկասյանի բժշկական զննումն ու բուժօգնության տրամադրումը։

Վերոգրյալ փաստական հանգամանքները վկայում են այն մասին, որ տվյալ դեպքում առկա են ՀՀ քրեական օրենսգրքով նախատեսված մի շարք հանցագործությունների հատկանիշներ, մասնավորապես՝

– ՀՀ քրեական օրենսգրքի 446-րդ հոդվածով նախատեսված պաշտոնեական անփութության, քանի որ քրեակատարողական հիմնարկի պաշտոնատար անձինք, ունենալով իրավական պարտականություն՝ ապահովելու ազատությունից զրկված անձանց բժշկական օգնության հասանելիությունը, չեն կատարել իրենց ծառայողական պարտականությունները, ինչի հետևանքով ստեղծվել է իրական և լուրջ վտանգ Վարդան Ղուկասյանի կյանքի և առողջության համար,

– ՀՀ քրեական օրենսգրքի 441-րդ հոդվածով նախատեսված պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելու, ինչպես նաև լիազորություններն անցնելու, այն առումով, որ պաշտոնատար անձինք իրենց լիազորությունները իրականացրել են ծառայության շահերին հակառակ՝ մասնավորապես խոչընդոտելով բժշկական օգնության տրամադրումը և մերժելով շտապօգնության բժշկին մուտք գործել քրեակատարողական հիմնարկ։

– Բացի այդ, այն մասով, որով բժշկական օգնության տրամադրումը ակտիվորեն խոչընդոտվել է, այդ թվում՝ շտապօգնության բժշկին քրեակատարողական հիմնարկ մուտք գործելու մերժման միջոցով, նշված փաստերը կարող են նաև բացահայտել ՀՀ քրեական օրենսգրքի 187-րդ հոդվածով նախատեսված հանցակազմի տարրեր, պայմանով, որ վարույթի ընթացքում կպարզվեն տվյալ արարքի համար պատասխանատու բժշկական կամ այլ համապատասխան անձինք։

Հետևաբար՝ պահանջում եմ․

• հանձնարարել նախաձեռնել քրեական վարույթ՝ վերոնշյալ հանցագործությունների հատկանիշներով,

• ապահովել արագ, ամբողջական և անաչառ նախաքննություն՝ խուսափելով շահերի բախումից և երաշխավորելով տուժողի իրավունքների լիարժեք պաշտպանությունը,

• հանրային քրեական հետապնդմամբ պատասխանատվության կանչել՝

. Սրբուհի Գալյանին, Հայաստանի Հանրապետության արդարադատության նախարար,

. Ծովինար Թադևոսյանին, ՀՀ արդարադատության նախարարության քրեակատարողական ծառայության պետ,

. Ռոբերտ Թամարյանին, ՀՀ արդարադատության նախարարության «Երևան–Կենտրոն» քրեակատարողական հիմնարկի պետ,

. Անահիտ Ավանեսյանին, Հայաստանի Հանրապետության առողջապահության նախարար,

. Կամո Մանուկյանին, ՀՀ առողջապահության նախարարության «Քրեակատարողական բժշկության կենտրոն» ՊՈԱԿ-ի տնօրեն։

Նրանց վարքագիծը հանդիսանում է ազատությունից զրկված անձանց նկատմամբ պետության դրական պարտավորությունների կոպիտ և շարունակական խախտում, որը հանգեցնում է անհատական քրեական պատասխանատվության։

Հարգանքով,

Զարուհի Փոստանջյան»։