Անդրանիկ Օզանյանի հոբելյանը կհամախմբի հերոսի անցած ուղին գնահատողներին

Հայ ազատագրական շարժման խորհրդանիշ Անդրանիկ Օզանյանի 150-րդ հոբելյանն այս տարի կհամախմբի հերոսի անցած ուղին գնահատողներին: Զորավարի հոբելյանի առթիվ կկազմակերպվեն մի շարք միջոցառումներ, որոնք արժանին կմատուցեն հերոսի հիշատակին:

«Զորավար Անդրանիկ» թանգարանի հիմնադիր-տնօրեն Իլյիչ Բեգլարյանը համոզված է՝ ամբողջ աշխարհը պետք է տոնի Անդրանիկի 150-ամյակը: «Զորավարն ուզում էր ապացուցել, որ ուժը քանակի մեջ չէ, այլ միասնության մեջ է: Մենք ամեն տարի փետրվարի 25-ին միջոցառում ենք կազմակերպում, որին մասնակցում են դպրոցականներ, գալիս են ասմունքելու, ռազմահայրենասիրական երգեր երգելու: Մենք մեծ ոգևորությամբ ենք նշում այս օրը: Մի շարք վայրերում, որտեղ զորավարի արձաններ են տեղադրված, անցկացվելու են միջոցառումներ»,- «Արմենպրես»-ի փոխանցմամբ՝ նշեց Իլյիչ Բեգլարյանը: Նա դժգոհություն հայտնեց՝ ասելով, որ այս տարին պետք է հայտարարվեր անդրանիկյան:

«Երբ քնելուց առաջ գլուխդ բարձին դնես, մի քիչ մտածիր ազգիդ մասին»,- ասում էր Անդրանիկը: Մեր թանգարանում ոչ միայն Անդրանիկի մասունքներն են, այլև այլ հերոսների, հայդուկների, զոհված ազատամարտիկների իրերը: Զորավարի իրերը 100-ից ավելի են, և ամեն տարի նմուշներ են ավելանում աշխարհի տարբեր ծայրերից: Ընդհանուր առմամբ՝ թանգարանում հերոսների մասին պատմող 3000 ցուցանմուշ կա: Մենք մեր մատաղ սերնդին դաստիարակում ենք անդրանիկյան ոգով»,-նշեց թանգարանի հիմնադիրը:

«Զորավար Անդրանիկ» երիտասարդական և Հայ եկեղեցու ուսանողական նախաձեռնությունների անդամ Հովհաննես Դաշտոյանը նշեց, որ փետրվարի 25-ին կանցկացվի քայլերթ դեպի զորավարի շիրիմ՝ Եռաբլուր, որը կուղեկցվի հայրենասիրական երգերով և պարերով: «Կանցկացվի հոգեհանգստի արարողություն: Այնուհետև Սուրբ Գրիգոր Լուսավորիչ եկեղեցու հարևանությամբ տոնախմբություն կլինի: Միջոցառումների նպատակն է մարդկանց հայտնի դարձնել հոբելյանի փաստը»,- հավելեց նա:

Նախաձեռնության անդամ Դավիթ Պարյանը համոզված է, որ Անդրանիկին նվիրված միջոցառումները պետք է չսահմանափակվեն փետրվարի 25-ով: «Ոչ միայն Եռաբլուրում, այլև ամբողջ Հայաստանում և Սփյուռքում պետք է միջոցառումներ անցկացվեն: Զորավարը մեր ազգային ազատագրական պայքարի մարմնացումն էր»,- նշեց նա՝ հավելելով, որ տարվա ընթացքում կտպագրվեն գրքեր, կկազմակերպվեն գիտաժողովներ:

Հայ ֆիդայապետ, զորահրամանատար Անդրանիկ Օզանյանը ծնվել է 1865 թվականի փետրվարի 25-ին: Սովորել է ծննդավայրի Մուշեղյան վարժարանում: 1890-ական թվականներին զինվորագրվել է Գուրգենի, Աղբյուր Սերոբի հայդուկախմբերին: Աղբյուր Սերոբի սպանությունից (1899 թ.) հետո Տարոնում հայերի ինքնապաշտպանությունը կազմակերպել են Անդրանիկն ու Հրայր Դժոխքը: Անդրանիկի համբավը տարածվել է հատկապես 1901 թվականի նոյեմբերի' Մշո Սուրբ Առաքելոց վանքի և 1904 թվականի օգոստոսի' Աղթամարի կռիվներից հետո: 1912–13 թթ. Բալկանյան 1-ին պատերազմի ժամանակ Անդրանիկը կազմավորել է Հայկական կամավորական վաշտ և բուլղարական բանակի կազմում մարտնչել թուրքական զորքերի դեմ:

Անդրանիկը պատգամել էր իր աճյունը Հայաստան տեղափոխել, որի համաձայն' 1928-ին այն նախ տեղափոխվել է Փարիզի Պեր Լաշեզ գերեզմանատուն, ապա 2000 թվականին՝ Երևան և ամփոփվել Եռաբլուրում: Անդրանիկի անունով կոչվել են փողոցներ, հրապարակներ, կանգնեցվել են նրան պատկերող հուշարձաններ, նրա մասին հյուսվել են ժողովրդական երգեր, գրվել վեպեր, բանաստեղծություններ: