Մադուրոն խորհրդարանից արտակարգ լիազորություններ է խնդրել ԱՄՆ-ին դիմակայելու համար

Վենեսուելայի նախագահ Նիկոլաս Մադուրոն խնդրել է խորհրդարանին՝ իրեն օժտել օրենքի ուժ ունեցող հրամանագրեր ընդունելու լիազորություններով: Այս քայլին նախագահի պաշտոնում Ուգո Չավեսին փոխարինած Մադուրոն դիմել է այն բանից հետո, երբ ԱՄՆ-ն պատժամիջոցներ է սահմանել Վենեսուելայի մի խումբ պաշտոնատարների դեմ, տեղեկացնում է «Արմենպրես»-ը՝ հղում անելով Reuters-ին:

«Ես եկել եմ համապատասխան օրենք ընդունելու խնդրանքով, որպեսզի դիմակայենք աշխարհի ամենահզոր երկրի՝ ԱՄՆ-ի ագրեսիային»,- հայտարարել է Մադուրոն՝ մարտի 10-ին ելույթ ունենալով խորհրդարանում:

Սպասվում է, որ Ազգային ժողովը, որտեղ գործող իշխանության կողմնակիցները մեծամասնություն ունեն, կբավարարի նախագահի խնդրանքը:

Ընդդիմությունը քննադատության է ենթարկել Մադուրոյի նախաձեռնությունը՝ այն գնահատելով «իշխանության զավթում» և մատնանշելով, որ նախագահն իր կառավարման օրոք Վաշինգտոնի հետ հարաբերությունների ամենախիստ սրումն օգտագործում է բնակչությանը տնտեսական հիմնախնդիրներից շեղելու համար:

Ավելի վաղ Մադուրոն ԱՄՆ-ի նախագահ Բարաք Օբամային մեղադրել է իր կառավարությունը տապալելու և Լատինամերիկյան երկրի գործերին միջամտելու փորձի մեջ: Նա այդպես է մեկնաբանել մարդու իրավունքների խախտումների և քաղաքական ընդդիմախոսների հետապնդումների կապակցությամբ Վենեսուելայի մի շարք բարձրաստիճան պաշտոնյաների նկատմամբ լրացուցիչ պատժամիջոցներ սահմանելու ԱՄՆ-ի որոշումը:

Պատժամիջոցները վերաբերել են Վենեսուելայի իրավապահ մարմինների, բանակի և հետախուզության ներկայացուցիչներին: Նաև արտակարգ դրություն է սահմանվել Վենեսուելայի նկատմամբ, քանի որ հարավամերիկյան երկրի իրադրությունն, ըստ Վաշինգտոնի, վտանգ է ներկայացնում ԱՄՆ-ի համար:

Վենեսուելայի արտաքին գործերի նախարար Դելսի Ռոդրիգեսը հայտնել է, որ Վենեսուելայի կառավարությունը Վաշինգտոնից հետ է կանչել իր առևտրական ներկայացուցիչ, ժամանակավոր հավատարմատար Մաքսիմիլիեն Սանչես Արվելայիսին: «Մենք անհապաղ կոնսուլտացիաների համար հետ ենք կանչել Միացյալ Նահանգներում ժամանակավոր հավատարմատար Մաքսիմիլիեն Արվելայիսին»,- գրել է նախարարը:

Մինչ այդ նա խոստացել է չհապաղել Վենեսուելայի կառավարության յոթ պաշտոնատարների նկատմամբ պատժամիջոցներ սահմանելու ԱՄՆ-ի նախագահ Բարաք Օբամայի որոշմանը պատասխանելու հարցում: Նա հայտնել է, որ Կարակասը սահմանափակել է ամերիկացի այն դիվանագետների թիվը, որոնց թույլատրված է աշխատել Վենեսուելայի տարածքում: