Solar Impulse 2 արևամարտկոցներով ինքնաթիռը բարեհաջող վայրէջք է կատարել Հնդկաստանում

Solar Impulse 2 արևամարտկոցներով շվեյցարական ինքնաթիռը, որը փորձում է շուրջերկրյա ճանապարհորդություն կատարել սոսկ արեգակնային էներգիայի միջոցով, Օմանից ժամանել է Հնդկաստանի Ահմեդաբադ քաղաք: Այդ մասին, ինչպես տեղեկացնում է «Արմենպրես»-ը, հաղորդել է նախագծի անձնակազմն իր Twitter-ում:

Ինքնաթիռը վայրէջք է կատարել մարտի 10-ին տեղական ժամանակով ժամը 23:25-ին (Երևանի ժամանակով ժամը 21:55-ին), նշված է հաղորդագրության մեջ: Թռիչքը շարունակվել է շուրջ 15 ժամ: Սա շուրջերկրյա թռիչքի երկրորդ փուլն է: Մեկ օր առաջ Solar Impulse-ը մեկնել էր Աբու Դաբիից և վայրէջք կատարել Մասկատում:

Այնուհետև, ինչպես նշում է «Ինտերֆաքս»-ը, Solar Impulse 2-ը պետք է Ահմեդաբադից ուղևորվի Հնդկաստանի մի այլ քաղաք՝ Վարանասի:

Solar Impulse 2 թռչող ապարատն այն սավառնակի մեծացված տարբերակն է, որն անցյալ տարի կտրել-անցել է Միացյալ Նահանգների տարածքն ափից ափ և սահմանել մի քանի ռեկորդ, այդ թվում՝ արեգակնային էներգիայով՝ մարդու կողմից կառավարվող ամենաերկարատև թռիչքի ռեկորդը՝ 26 ժամ:

Solar Impulse 2-ը, ինչպես և դրա նախորդը, վարում են էներգիայի այլընտրանքային աղբյուրների երկու էնտուզիաստներ՝ շվեյցարացիներ Բերտրան Պիկարը և Անդրե Բորշբերգը: