Սիրիայում հակամարտության 4 տարիներին կյանքի միջին տևողությունը կրճատվել է 20 տարով

Սիրիայում կառավարական ուժերի և ընդդիմադիր զինված խմբավորումների միջև հակամարտության գրեթե 4 տարում կյանքի միջին տևողությունը կրճատվել է մոտ 20 տարով: Այս մասին ասվում է «Քաղաքական հետազոտությունների սիրիական կենտրոն» ոչ կառավարական կազմակերպության զեկույցում, փոխանցում է ՏԱՍՍ-ը:

Իրավապաշտպանների տվյալներով՝ զինված հակամարտության հետևանքով արդեն զոհվել է ավելի քան 210 հազար մարդ, մոտ 840 հազարը վնասվածքներ է ստացել:

Հետազոտողները նշում են, որ այդպիսով ռազմական գործողությունների հետևանքով զոհվածների ու վիրավորների թիվը հասել է նախապատերազմյան Սիրիայի բնակչության 6%-ին:

«Նույն կերպ սարսափեցնում են նաև պակաս ակնհայտ հետևանքները՝ 2014թ. դրությամբ կյանքի միջին տևողությունը 2010թ. 75,9 տարուց կրճատվել է մինչև 55,7 տարի: Այդպիսով այդ ցուցանիշը նվազել է 27%-ով»,- ասվում է փաստաթղթում:

Վերջին 4 տարում Սիրիայում իրենց տները ստիպված է եղել լքել ավելի քան 10 մլն մարդ, որոնցից 3,3 միլիոնն այլ երկրներում է ապաստանել՝ պաշտոնապես գրանցվելով որպես փախստական: Հաշվի առնելով ևս 1,55 մլն մարդկանց, որոնք արտասահման են մեկնել աշխատելու, Սիրիայի բնակչությունը կրճատվել է 15%-ով:

Զեկույցի հեղինակները նաև նշում են, որ ընդհանուր տնտեսական կորուստները հակամարտության սկզբից մինչև 2014թ. վերջը գնահատվում է 202,6 մլրդ դոլար, միաժամանակ, բաժնետիրական կապիտալի վնասը կազմում է ընդհանուր կորստի 35,5%-ը: Տնտեսությանն ընդհանուր վնասը համարժեք է 2010թ. մշտական գների դեպքում համախառն ներքին արտադրանքի 383%-ին:

Դա հանգեցրել է աղետալի հետևանքների երկրի բնակչության համար: Որպես հետևանք՝ Սիրիան, որը նախկինում առանձնանում էր հարաբերական տնտեսական կայունությամբ, վերածվել է «աղքատների երկրի». ներկայումս Սիրիայի 5 բնակչից 4-ն ապրում է մշտական կարիքի մեջ, իսկ բնակչության 30%-ը`ծայրահեղ աղքատության մեջ` նշվում է զեկույցում: