Իսրայելի ՊՆ-ն հերքում է ԻՊ-ի կողմից սպանված իսրայելցի արաբի կապը հատուկ ծառայությունների հետ

 «Իսլամական պետության» կողմից գլխատված, Արևելյան Երուսաղեմի բնակիչ Սայիդ Իսմայիլ Մուսալլամը, ով մեղադրվում էր լրտեսության մեջ, որևէ կապ չունի իսրայելական հատուկ ծառայությունների հետ: Այս մասին հայտարարել է Իսրայելի պաշտպանության նախարար Մոշե Յալոնը: Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, նախարարը նախազգուշացրել է Մերձավոր Արևելքին սպառնացող իսլամիստական ծայրահեղականության տարածման մասին:

Նման հայտարարությամբ հանդես է եկել նաև սպանվածի եղբայրը՝ Մուհամմադ Մուսալլամը: Նրա խոսքով' իսլամիստները եղբորը տարել են Սիրիա՝ խոստանալով լավ աշխատավարձ և հարսնացու, սակայն խաբել են:

Ավելի վաղ «Իսլամական պետութունը» համացանցում տարածել է տեսանյութ, որտեղ ցուցադրվում է, թե ինչպես է սպանվում իսրայելցի գերին: Տասը րոպե տևողությամբ տեսանյութում երևում է նարնջագույն հագուստով Մուհամմադ Սայիդ Իսմայիլ Մուսալլամը, նրա կողքին՝ իսրայելական անձնագիրը, այնուհետև կադրերում երևում է ռազմական հագուստով մի երեխա, ով զենքը պահել է մեղադրյալի գլխին: Տեսանյութում երևում է ևս մեկ իսլամիստ, ով հորդորում է երեխային կրակել: