25 մլն դոլարով վաճառվել է Բաթումի տեխնոլոգիական համալսարանի շենքը

Բաթումի տեխնոլոգիական համալսարանի շենքը 25 միլիոն 4 հազար 626 դոլարով վաճառվել է RED-Co (Real Estate Development Company) ընկերությանը: Այդ մասին, ինչպես տեղեկացնում է «Արմենպրես»-ը, հաղորդել է Վրաստանի «Փիրվելի ռադիո» ռադիոկայանը:

Ռադիոկայանի տվյալներով՝ փակ աճուրդում համալսարանի շենքի մեկնարկային գինը կազմել է 25 միլիոն դոլար, և այն գնելու ցանկություն է հայտնել սոսկ մեկ ընկերություն:

Բաթումի տեխնոլոգիական համալսարանի շենքը Վրաստանի երրորդ նախագահ Միխեիլ Սաակաշվիլիի վերջին նախագծերից մեկն է, որն անձամբ է վերահսկել դրա շինարարության ընթացքը: Բաթումի տեխնոլոգիական համալսարանը պետք է ուսումնական գործընթացի սկզբին պատրաստ լիներ 2013 թվականին:

2012 թվականին վրացի միլիարդատեր Բիձինա Իվանիշվիլիի գլխավորած «Վրացական երազանք» քաղաքական կոալիցիայի՝ իշխանության գլուխ անցնելուց հետո համալսարանի շինարարության նախագիծը սառեցվեց: 2015 թվականի սկզբին Վրաստանի վարչապետ Իրակլի Ղարիբաշվիլին հայտարարեց, որ մտադիր է վաճառել «Սահակաշվիլիի նախագիծը»: