Մեքսիկայում հանցագործները գլխատել են քաղաքապետի թեկնածուին

Մեքսիկայի Գերերոյի նահանգում հայտնաբերվել է քաղաքական գործիչ Աիդա Նավայի գլխատված մարմինը, որը մտադրվել էր հունիսին իր թեկնածությունն առաջադրել տեղական ընտրություններում, հաղորդում է «Արմենպրես»-ը՝ հղում անելով BBC-ին:

Նավայի մարմինը գտել են նահանգի մայրաքաղաք Չիլպանսինգոյի շրջանում՝ ճանապարհին:

Դիակի մոտ եղել է գրություն, որում ասված է, թե նույնն է սպասում բոլոր նրանց հետ, ովքեր «կշեղվեն ուղեգծից»:

Գրությունն ստորագրված է եղել «Լոս Ռոյոս» խմբավորման կողմից: Դա նահանգի ամենախոշոր հանցախմբերից մեկն է:

Անցյալ տարի խմբավորումն առևանգել էր Նավայի որդուն: Նրա ամուսինը, որը նույնպես քաղաքապետ է եղել, զոհվել է այդ խմբի ձեռքով:

Գերերոյի նահանգն ամենավտանգավորներից մեկն է համարվում Մեքսիկայում: