Մոսկվայի պետհամալսարանը 25-րդ տեղն է զբաղեցրել հեղինակավոր բուհերի համաշխարհային վարկանիշում

Մոսկվայի և Սանկտ Պետերբուրգի պետական համալսարանները ներառված են աշխարհի ամենահեղինակավոր բուհերի առաջին հարյուրյակում: Հեղինակավորության վարկանիշում Մոսկվայի պետհամալսարանն (ՄՊՀ) զբաղեցրել է 25-րդ հորիզոնականը, տեղեկացնում է «Արմենպրես»-ը:

Հետազոտությունը պատրաստել է բրիտանական Times Higher Education հանդեսը: Աշխարհի բուհերի վարկանիշը կազմվում է 2011 թվականից: ՄՊՀ-ն ավելի վաղ երբեք այդքան բարձր տեղ չի զբաղեցրել. անցյալ տարի արտասահմանյան կրթական կենտրոնները Լոմոնոսովի «սիրասուն զավակին» հետ էին մղել վեցերորդ տասնյակ: Այս տարի Սանկտ Պետերբուրգի համալսարանն առաջին անգամ հայտնվել է վարկանիշի իններորդ տասնյակում:

Բուհերը դասակարգվել են 142 երկրների 10,5 հազար պրոֆեսորների հարցման արդյունքներով: Հետազոտության մասնակցի նկատմամբ պայմաններից մեկը բուհում առնվազն 15 տարվա դասախոսական ստաժն է: Դրա հետ մեկտեղ, հանդեսը նախազգուշացնում է, որ բուհերի ռենքինգն, այնուամենայնիվ, թեև հեղինակավոր է, բայց ստույգ չէ, քանի որ կառուցված է բուհի բրենդի վերաբերյալ գիտնականների սուբյեկտիվ պատկերացումների վրա:

Առաջատարների եռյակն ավանդաբար կազմում են Հարվարդը, Քեմբրիջը և Օքսֆորդը: Առաջին տասնյակում են Փրինստոնը, Եյլը և Բերկլին: Ավելի վաղ Times Higher Education հանդեսը բուհերի վարկանիշը ներկայացրել է դասավանդման մակարդակով: Այդ ցուցակում 2013 թվականին ՄՊՀ-ն գտնվել է 226-ից մինչև 250-րդ հորիզոնականների խմբում, 2014-2015 թվականներին զբաղեցրել է 196-րդ տեղը: