Մադուրոն գնալու է ԱՄՆ և մարտահրավեր է նետելու Օբամային

Վենեսուելայի նախագահ Նիկոլաս Մադուրոն հայտարարել է, որ կարող է գնալ Վաշինգտոն և մարտահրավեր նետել ամերիկացի իր պաշտոնակցին՝ Բարաք Օբամային, տեղեկացնում է «Արմենպրես»-ը՝ հղում անելով Reuters-ին:

«Մենք աշխարհի բոլոր դիվանագիտական կապուղիներով պահանջում ենք, որ նախագահ Օբաման շտկի սխալը և չեղյալ հայտարարի այն անբարոյական հրամանագիրը, որով նա Վենեսուելան սպառնալիք է հայտարարել Միացյալ Նահանգների համար»,-ասել է Մադուրոն:

Ելույթ ունենալով գրքի տոնավաճառում՝ նախագահը հայտարարել է, թե Վենեսուելան այդ խնդրին նվիրված միջոցառում է պատրաստում Վաշինգտոնում: Մանրամասներ նա չի հայտնել:

Մադուրոյի խոսքով՝ ինքը պատրաստ է ժամանել ԱՄՆ-ի մայրաքաղաք՝ ասելու այդ երկրի կառավարությանը, որ նա կոպիտ սխալներ է թույլ տալիս:

Վերջին ժամանակներս կտրուկ սրվել են Վենեսուելայի և ԱՄՆ-ի հարաբերությունները: Փետրվարի 17-ին Մադուրոն երկրից արտաքսել է ամերիկացի երեք դիվանագետների: Նախագահն ԱՄՆ-ին մեղադրել է ապստամբական շարժմանն աջակցելու և Վենեսուելայի կառավարությունը տապալելու փորձի համար:

Մարտի 9-ին Օբաման հայտարարել է, որ Կարակասի գործողությունները սպառնալիք են ԱՄՆ-ի ազգային անվտանգության համար և պատժամիջոցներ է սահմանել այդ երկրի յոթ բարձրաստիճան պաշտոնյաների նկատմամբ: Վաշինգտոնի կարծիքով՝ նրանք խախտել են Վենեսուելայի քաղաքացիների իրավունքները և ներքաշված են եղել կոռուպցիոն սխեմաներում: Ի պատասխան Վենեսուելան հետ է կանչել Միացյալ Նահանգներում իր ժամանակավոր համատարմատարին: