Կազանում ադրբեջանցուն պատկանող առևտրի կենտրոնի այրվելու հետևանքով մահացածների թիվը հասել է 11-ի

Ռուսաստանի Դաշնության Թաթարստանի մայրաքաղաք Կազանում ծագումով ադրբեջանցի Հուսեին Գահրամանովին պատկանող «Ադմիրալ» առևտրի կենտրոնում մարտի 11-ին ծագած հրդեհի արդյունքում զոհվածների թիվը հասել է 11-ի:

Այս մասին, ինչպես հաղորդում է «Արմենպրես»-ը, հայտնել է Թաթարստանի արտակարգ իրավիճակների ծառայությունը: Նշվում է, որ զոհվածներից երեքն Ադրբեջանի քաղաքացիներ են:

ՌԴ ԱԻՆ Պրիվոլժսկի տրածաշրջանային կենտրոնի պետ Իգոր Պանշինը ԶԼՄ-ներին հայտնել է, որ փրկարարները շարունակում են առևտրի կենտրոնի փլատակաների տակից դուրս բերել զոհվածների դիերը: Նրա կարծիքով' փլատակների տակ կարող է գտնվել ևս 25 մարդու դիակ:

ՌԴ ԱԻՆ մամուլի քարտուղար Անդրեյ Ռադիգինը «Ռոսիա 24» հեռուստաալիքի եթերում հայտնել էր, որ հրդեհը մեծ ծավալ է ընդգրկել այն բանի պատճառով, որ անձնակազմը ոչ թե անմիջապես հրշեջ ստորաբաժանումներ է հրավիրել, այլ որոշ ժամանակ փորձել է կրակի հետ պայքարել ինքնուրույն:

Նրա խոսքով՝ «Ադմիրալ» եռահարկ առևտրի կենտրոնում խոշոր հրդեհի պատճառի գլխավոր վարկածներից մեկը շենքին կից սրճարանի աշխատակիցների անգրագետ գործողություններն են, որոնցից էլ սկսվել է հրդեհը: «Հրշեջների ժամանման պահին հրդեհն արդեն ընդգրկել էր ավելի քան 100 քմ տարածք, որտեղ գտնվում են առևտրի կետերը»,- ասել է Ա.Ռադիգինը:

Կազանի խոշորագույն առևտրի կենտրոնում հրդեհը տարածվել է 4 հազար քմ տարածքի վրա: Շենքից տարհանվել է 650-ից ավելի մարդ: Շենքն ամբողջությամբ այրվել է: 36 մարդ վնասվածքներ է ստացել:

Հրդեհի ժամանակ զոհվածների և տուժածների մեջ մի քանի երկրների քաղաքացիներ կան: Ռուսաստանցիներից բացի, զոհվածների ցուցակում նշվում են Տաջիկստանի և Ադրբեջանի քաղաքացիների անուններ ևս: 55 տուժածներից երկուսը Վիետնամի, երկուսը' Ադրբեջանի, երկուսը Ղրղզստանի և մեկը Տաջիկստանի քաղաքացիներ են:

«Ադմիրալ» առևտրի կենտրոնի սեփականատեր Հուսեին Գահրամանովը ձերբակալվել է: