Գերմանացիների մեծամասնությունը հանդես է գալիս եվրագոտուց Հունաստանի դուրս գալու օգտին

Գերմանիայի քաղաքացիների մեծամասնությունը՝ 52 տոկոսը, արտահայտվել է եվրագոտուց Հունաստանի դուրս գալու օգտին: Ինչպես տեղեկացնում է «Արմենպրես»-ը, այդ մասին են վկայում գերմանական ZDF հեռուստաալիքի կողմից անցկացված հարցման արդյունքները, որոնք հրապարակվել են մարտի 13-ին:

Իրենց հերթին հարցման մասնակիցների 40 տոկոսը դրական պատասխան է տվել հարցին, թե պետք է արդյոք ճգնաժամ ապրող պետությունը պահպանի անդամակցությունն արժութային միությանը: 8 տոկոսը նախընտրել է ձեռնպահ մնալ պատասխանից:

Դրա հետ մեկտեղ, նկատվում է այն միտումը, որ ավելի ու ավելի քիչ թվով գերմանացիներ են ըմբռնումով վերաբերվում Հունաստանի վարչապետ Ալեքսիս Ցիպրասի քաղաքականությանը: Դեռ մեկ ամիս առաջ հակառակ իրավիճակն էր. եվրագոտու ամբողջականության օգտին հանդես էր գալիս հարցվածների 52 տոկոսը, իսկ 41 տոկոսը, ընդհակառակը, արտահայտվում էր եվրագոտուց Աթենքի դուրս գալու օգտին:

Հարցմանը մասնակցել է շուրջ 1,2 հազար մարդ:

Վերջին ժամանակներս հույն քաղաքական գործիչներն ավելի ու ավելի հաճախ են բարձրացնում ռազմատուգանքների թեման՝ Երկրորդ համաշխարհային պատերազմի տարիներին նացիոնալ սոցիալիստների կատարած հանցագործությունների դիմաց, ինչը, ամենայն հավանականությամբ, բացասաբար է ազդում գերմանացիների տրամադրությունների վրա: Աթենքի մի խումբ խորհրդարանականների գնահատումներով՝ ԳՖՀ-ն պետք է ճգնաժամ ապրող Հունաստանին 7,1 մլրդ դոլար վճարի 1938 թվականի գներով, այսինքն՝ 108 մլրդ եվրո՝ ներկայիս գներով:

Բեռլինում անիրավազոր են համարում այս պահանջները՝ վկայակոչելով Իտալիայի և ԳՖՀ-ի համանման պահանջներին վերաբերող 2012 թվականի իրավաբանական նախադեպը, որոնք չբավարարվեցին: Բացի այդ, այստեղ մատնանշում են Գերմանիային վերաբերող հարցերի վերջնական կարգավորման մասին «Երկու գումարած չորս» պայմանագիրը:

Գերմանական ԶԼՄ-ները հույների պահանջները համարում են «բարոյական շորթում», քանի որ հույները փորձում են խփել գերմանացիների ցավոտ տեղին՝ Երրորդ ռայխի ժամանակներում նացիստների կողմից կատարված հանցագործություններին: Զուգահեռաբար այն տեսակետն է հայտնվում, որ այդպիսով Հունաստանի վարչապետ Ալեքսիս Ցիպրասը փորձում է հասարակայնությանը շեղել նոր կառավարության խնդիրներից, որն ի վիճակի չէ իրականացնել նախընտրական խոստումները:

Ֆինանսների նախարար Վոլֆգանգ Շոյբլեն իր հերթին չի բացառել եվրագոտուց Հունաստանի դուրս գալը: Նա պարզաբանել է, որ այս կամ այն որոշման համար ամբողջ պատասխանատվությունն «ընկած է Հունաստանի վրա», հաղորդել է ՏԱՍՍ-ը: