Հնդկական հարսանիքը ձախողվել է փեսայի՝ թվաբանություն չիմանալու պատճառով

Հնդկաստանում հարսանիքը ձախողվել է այն պատճառով, որ փեսան թվաբանություն չի իմացել: Ինչպես հաղորդում է «Արմենպրես»-ը՝ հղում անելով The Times of India թերթին, Ութար Փրադեշի նահանգում հարսանյաց հանդեսի ժամանակ Ռամ Բարան անունով երիտասարդը երկու ընտանիքների անդամների և գյուղի բնակիչների ներկայությամբ չի կարողացել պատաս խանել հարսի քույրերի հարցին և ճիշտ գումարել 15-ը և 6-ը:

Նա ասել է, որ գումարը հավասար է 17-ի: Լսելով դա՝ նրա հարսնացուն՝ Լավլի Սինգհը, կտրականապես հրաժարվել է ամուսնանալ նրա հետ՝ հայտարարելով, որ մտադիր չէ ամուսնանալ անկիրթ մարդու հետ, և, չնայած փեսայի ընտանիքի բոլոր թախանձանքներին, ուղևորվել է տուն:

Դստեր որոշումը պաշտպանել է նաև հարսի հայրը՝ Մոհար Սինգհը: «Ցանկացած առաջին դասարանցի ի վիճակի է լուծել այս պարզագույն խնդիրը,- պարզաբանել է նա:- Փեսայի ընտանիքը խաբել է մեզ՝ թաքցնելով նրա տգիտությունը»: Սինգհի խոսքով՝ իր ընտանիքը հայտնվել է անհարմար վիճակում՝ շտապ կարգով չեղյալ հայտարարելով պլանավորված ճոխ տոնակատարությունը: Հարսի հարազատները դիմել են ոստիկանություն՝ պահանջելով, որ կարգի պահապանները Ռամ Բարանին հարկադրեն վերադարձնելու այն նվերները, որոնք նա ստացել է նախնական ամուսնական համաձայնության ընթացքում, բայց վե րջինս դա հոժարակամ է արել:

Ըստ վիճակագրության՝ Հնդկաստանի չափահաս բնակչության ավելի քան քառորդ մասն անգրագետ է: Միջին հաշվով հնդիկը դպրոցում սովորում է երկու տարի: Անգրագիտությունը առավել տարածված է կանանց շրջանում, առանձնապես ստորին կաստաներին պատկանող կանանց, ինչպես նաև կրոնական փոքրամասնությունների, երկրի հյուսիս - արևելքի ցեղերի և աղքատների շրջանում: