Վանուատուն ամայացրած «Պեմ» ցիկլոնը հասել է Նոր Զելանդիա

«Պեմ» արևադարձային ցիկլոնը, որը աղետալի վնաս է հասցրել Վանուատու ոչ մեծ խաղաղօվկիանոսյան պետությանը, շարունակում է շարժվել դեպի հարավ և մոտենում է Նոր Զելանդիային, տեղեկացնում է «Արմենպրես»-ը:

Մարտի 16-ին այն փոքր-ինչ թուլացել է: Նորզելանդական Հյուսիսային կղզու մի շարք շրջաններում քամու պոռթկումների արագությունը վայրկյանում կազմել է շուրջ 40 մետր: Կղզու մի քանի ցածրադիր շրջաններ հեղեղվել են տեղատարափ անձրևներից, և փրկարարները դրանց բնակիչների տարհանում են իրականացրել: Մի շարք ոչ մեծ քաղաքներում ընդհատվել է էլեկտրականության մատակարարումը: Նոր Զելանդիայի իշխանությունները երկրի բնակիչներին վաղօրոք հայտնել էին վերահաս սպառնալիքի մասին՝ հանձնարարելով ջրի ու մթերքների պաշար տեսնել առնվազն երեք օրվա համար:

Հյուսիսային կղզում գտնվում են երկրի խոշորագույն քաղաքը՝ Օքլենդը և նրա մայրաքաղաքը՝ Վելինգտոնը:

«Պեմ» արևադարձային ցիկլոնն աղետալի հարված է հասցրել Վանուատու պետությանը և «վիթխարի հումանիտար փորձություն կդառնա ամբողջ խաղաղօվկիանոսյան տարածաշրջանի համար», հայտարարել է Նոր Զելանդիայի արտաքին գործերի նախարար Մարեյ Մակքալին:

Ներկայումս պաշտոնապես հայտարարված է ութ զոհվածի մասին, բայց խոսքը վերաբերում է միայն Վանուատուի մայրաքաղաք Պորտ-Վիլայում գրանցված զոհերին: Մինչ այժմ հաստատված չէ Պենամա հյուսիսարևելյան նահանգի կղզիների 44 բնակիչների զոհվելը, ինչը բացատրվում է երկրի կղզիների միջև կապի բացակայությամբ: Առանձնակի տագնապ է առաջացնում Տաննա կղզու 29 հազար բնակիչների ճակատագիրը, որոնց վիճակված է դիմակայել ցիկլոնի էպիկենտրոնին, և որոնց մասին առայժմ ոչինչ հայտնի չէ:

Ինչպես նշում է ՏԱՍՍ գործակալությունը, մարտի 15-ին Վանուատուի մայրաքաղաքի օդանավակայանում վայրէջք են կատարել երկու ավստրալական և մեկ նորզելանդական ռազմափոխադրական ինքնաթիռներ, որոնք իրենց հետ բերել են փրկարարների, բժիշկների և հումանիտար բեռներ: Ինչպես հայտնել է այդ երկրի վարչապետ Էնելե Սապոագան, նրա բնակիչների 45 տոկոսն անօթևան է մնացել «Պեմ» ցիկլոնի հարուցած մակընթացության հսկայական ալիքների պատճառով: