Կազանի այրված առևտրական կենտրոնում փրկարար գործողությունը կավարտվի մարտի 17-ին

Կազանում փրկարարներին 20 մետր է մնացել է մինչև այրված «Ադմիրալ» առևտրական կենտրոնի հեռավոր պատին հասնելը, որտեղ փլվածքների տակ կարող է գտնվել երկու մարդ: Այս մասին, ինչպես տեղեկացնում է «Արմենպրես»-ը, ՏԱՍՍ-ին հայտնել է հանրապետության արտակարգ իրավիճակների նախարարության մամուլի ծառայության ղեկավար Անդրեյ Ռոդիգինը:

«Երրրորդ և չորրորդ հատվածամասերում փլվածքների մաքրումը գործնականում ավարտված է, ընդամենն անցել են 88 մետր: Մինչև հեռավոր պատը, որտեղ ենթադրաբար գտնվում են մարդիկ, մնացել է 20 մետր,- ասել է նա:- Մնացած երեք հատվածամասերում փրկարարներն առաջ են անցել կեսից ավելին»:

Ընդամենը վթարային-փրկարարական և այլ անհետաձգելի աշխատանքներում ներգրավված է 1040 մարդ, 177 միավոր տեխնիկա: Աշխատանքը կազմակերպված է երեք հերթափոխով:

Կազանի առևտրական կենտրոնի փլվածքների տակ, ճշգրտված տվյալներով՝ մնում է երկու մարդ, ենթադրաբար՝ Ռուսաստանի քաղաքացիներ: Առևտրական կենտրոնի փլվածքներից հանվել է 17 մարմին, այդ թվում՝ երկուսը Տաջիկստանի, մեկը՝ Ղրղզստանի, մեկն Ադրբեջանի, երեքն՝ Ուզբեկստանի, մեկը՝ Թուրքիայի քաղաքացիներ: Հուղարկավորելու համար հարազատներին է տրվել զոհվածների 13 մարմին:

Կազանի այրված առևտրական կենտրոնում փրկարարական գործողությունը կավարտվի մարտի 17-ին, հայտնել է Ռուսաստանի արտակարգ իրավիճակների նախարարության Մերձվոլգյան տարածաշրջանային կենտրոնի պետ Իգոր Պանշինը:

«Ադմիրալ» առևտրական կենտրոնում հրդեհը տեղի է ունեցել մարտի 11-ի ցերեկը և մարվել է մի քանի ժամում: Հետաքննությունն ստուգում է հրդեհի մի քանի վարկած, այդ թվում՝ կարճ միացում, կանխամտածված հրկիզում և հրդեհային անվտանգության կանոնների խախտում: