Քերին և Զարիֆը Լոզանում վերսկսել են բանակցությունները Իրանի միջուկային ծրագրի շուրջ

ԱՄՆ-ի պետքարտուղար Ջոն Քերին և Իրանի արտաքին գործերի նախարար Մոհամադ Ջավադ Զարիֆը Լոզանում վերսկսել են Թեհրանի միջուկային ծրագրի շուրջ բանակցությունները, որոնց ընթացքում կփորձեն կարգավորել մնացած տարաձայնությունները, տեղեկացնում է «Արմենպրես»-ը:

Նրանց նախորդ հանդիպումը կայացել է մարտի 16-ին և տևել է հինգ ժամ: Այնուհետև Իրանի ԱԳ նախարարը կարճատև այց է կատարել Բրյուսել, որտեղ հանդիպում է ունեցել Ֆրանսիայի, Մեծ Բրիտանիայի և Գերմանիայի իր պաշտոնակիցների հետ: Բրյուսելի հանդիպումը որևիցե բեկում չի արձանագրել: Դրա արդյունքում կողմերը միայն արձանագրել են «բանավեճի դրական բնույթը» և վիճելի հարցերի լուծումը շարունակելու անհրաժեշտությունը:

Լոզանում Քերիի և Զարիֆի բանակցություններն ընթանում են Ժնևի լճի ափի պերճաշուք հյուրանոցներից մեկում: Մարտի 16-ի բանակցությունները ցույց տվեցին, որ Իսլամական Հանրապետության միջուկային ծրագրի մի շարք հիմնական հարցերում տարաձայնությունները պահպանվում են, թեև առանձին ասպեկտների խուրջ հաջողվել է հասնել առաջխաղացման: Այդ մասին ՏԱՍՍ-ին հայտնել է իրանական պատվիրակության մի աղբյուր:

«Փոխզիջումային հանգուցալուծումներ առաջարկվում են առկա բոլոր վիճելի հարցերի, այդ թվում՝ պատժամիջոցների հարցում»,-նշել է նա: Դրա հետ մեկտեղ գործակալության զրուցակիցը հիշեցրել է, որ բանակցությունների ներկայիս փուլը կտևի առնվազն մինչև մարտի 20-ը, այնպես որ համաձայնություն հասնելու համար ժամանակ դեռ կա: