Արտասահմանյան բանկերը լքում են թուրքական շուկան

Եվս մեկ արտասահմանյան բանկ է լքում թուրքական շուկան:

Ինչպես հաղորդում է «Արմենպրես»-ը, «Միլիեթ» թերթը հայտնում է, որ թուրքական շուկան որոշել է լքել նաև Royal Bank of Scotland (RBS) բանկը:

Ըստ թերթի, սպասվում է, որ մոտ ժամանակում RBS-ը կվաճառի Թուրքիայի բանկային շուկայում իր մասնաբաժինը: Թուրքական շուկայից RBS-ի հեռանալու պատճառն անհայտ է:

Royal Bank of Scotland-ը հանդիսանում է Շոտլանդիայի խոշորագույն առվտրային բանկերից մեկը, ինչպես նաև իր մեծությամբ երկրորդը Մեծ Բրիտանիայում: Բանկը հիմնադրվել է 1727 թվականին և հանդիսանում է արժեթղթեր հրատարակելու իրավունք ունեցող շոտլանդական երեք բանկերից մեկը:

Ընթացիկ տարվա մարտի սկզբին հայտնի էր դարձել, որ 1812 թվականին հիմնադրված ամերիկյան խոշորագույն Citibank-ը վաճառում է թուրքական Akbank-ում ունեցած իր մասնաբաժինը: Բանկի կողմից վաճառքի հանված բաժնետոմսերի ընդհանուր արժեքը կազմում է 1,2 մլրդ դոլար:

Թուրքիայի բանկային հատվածը հանդիսանում է երկրի էկոնոմիկայի առաջատար ոլորտներից մեկը: Թուրքիայում գործում են 49 բանկ, որոնցից 36-ը հանդիսանում են առևտրային, իսկ 13-ը՝ ներդրումային:

Թուրքիայում գործում են երեք պետական, 100 տոկոս թուրքական կապիտալով 12 մասնավոր բանկ, 16 բանկ ստեղծվել են արտասահմանյան կապիտալի մասնակցությամբ: