Արևային մարտկոցներով աշխատող Solar Impulse 2 ինքնաթիռն սկսել է շուրջերկրյա թռիչքի երրորդ փուլը

Արևային մարտկոցներով աշխատող Solar Impulse 2 ինքնաթիռը մարտի 18-ի առավոտյան մեկնել է Հնդկաստանի Ահմադաբադ քաղաքից՝ սկսելով 12 փուլից բաղկացած շուրջերկրյա թռիչքի երրորդ փուլը: Այն այժմ ուղևորվում է երկրի հյուսիս-արևելքի Վարանսի քաղաք: Ինչպես տեղեկացնում է «Արմենպրես»-ը՝ հղում անելով India TV News հեռուստաալիքին, Ահմադաբադից Solar Impulse 2-ի թռիչքը տեղի է ունեցել տեղական ժամանակով ժամը 07:15-ին: Ինչպես սպասվում է, վայրէջքից հետո ինքնաթիռը Վարանսի քաղաքում կգտնվի մոտավորապես ութ ժամ:

Հնդկաստանից հետո ինքնաթիռը պետք է ուղևորվի Մանդալայ (Մյանմա), Չունցին և Նանկին (Չինաստան): Այնուհետև Solar Impulse 2-ը կհատի Խաղաղ օվկիանոսը և վայրէջք կկատարի Ֆինիկսում և Նյու Յորքում: Հաղթահարելով Ատլանտյան օվկիանոսը՝ ինքնաթիռը կանգ կառնի Հարավային Եվրոպայում կամ Հյուսիսային Աֆրիկայում և կվերադառնա Աբու Դաբի: Շուրջերկրյա ճանապարհորդությունը կտևի հինգ ամիս:

Solar Impulse 2 թռչող ապարատն այն սավառնակի մեծացված տարբերակն է, որն անցյալ տարի կտրել-անցել է Միացյալ Նահանգների տարածքն ափից ափ և սահմանել մի քանի ռեկորդ, այդ թվում՝ արեգակնային էներգիայով՝ մարդու կողմից կառավարվող ամենաերկարատև թռիչքի ռեկորդը՝ 26 ժամ:

Solar Impulse 2 ինքնաթիռը հասարակայնությանը ներկայացվել է 2014 թվականի ապրիլին և հաջողությամբ փորձարկվել է այդ տարվա հունիսին: Դրա թևերի բացվածքը կազմում է 72 մետր, քաշը հասնում է 2,3 տոննայի: Ինքնաթիռի թևը ծածկված է 17,2,հազար արևամարտկոցներով, որոնք էներգիա են արտադրում թռչող ապարատի էլեկտրաշարժիչներին մատակարարելու համար: Ինքնաթիռի առավելագույն արագությունը ժամում 140 կիլոմետր է:

Solar Impulse 2-ը, ինչպես և դրա նախորդը, վարում են էներգիայի այլընտրանքային աղբյուրների երկու էնտուզիաստներ՝ շվեյցարացիներ Բերտրան Պիկարը և Անդրե Բորշբերգը, հաղորդել է ՌԻԱ Նովոստին: