Facebook ընկերությունը հայտարարել է սեփական վճարային համակարգի գործարկման մասին

Facebook ընկերությունը հայտարարել է սեփական վճարային համակարգի գործարկման մասին, որը թույլ է տալիս վճարումներ կատարել Messenger հավելվածի միջոցով: Ինչպես տեղեկացնում է «Արմենպրես»-ը, համապատասխան հաղորդագրությունը մարտի 17-ին տարածել է այս խոշորագույն սոցիալական ցանցը: «Այսօր մենք նոր գործառույթ ենք ավելացնում Messenger-ում, որը հնարավորություն է ընձեռում ավելի հարմար և անվտանգ ձևով դրամական փոխանցումներ ուղարկել և ստանալ ծանոթների միջև,- նշված է դրանում:- Սույն ծառայությունն ԱՄՆ-ի տարածքում կսկսի գործել առաջիկա ամիսներին»:

Վճարումներ կարելի է անել ինչպես ստացիոնար համակարգիչներից, այնպես էլ պլանշետներից, սմարթֆոններից և այլ շարժական սարքերից, որոնք ունեն Google և Apple ընկերությունների գործառնական համակարգեր:

Մասնագետները նշում են, որ շուկայում Facebook-ի սեփական վճարային համակարգի հայտնվելն արտացոլում է այդ ընկերության փորձերը հետ չմնալու մրցակիցներից և իր սպասարկյալներին հնարավորություն ընձեռելու վճարման գործողություններ կատարել միմյանց միջև: Ինչպես նշում է ՏԱՍՍ-ը, Facebook-ն արդեն հայտարարել է, որ վճար չի գանձի Messenger-ով դրամական փոխանցումներ կատարելու համար: