ՄԱԿ-ն ԻՊ-ին մեղադրել է եզդիների ցեղասպության մեջ

ՄԱԿ-ն «Իսլամական պետությանը» մեղադրել է Իրաքում եզդիների հանդեպ զանգվածային հանցագործություններ' նաև ցեղասպանություն իրականացնելու մեջ: Ինչպես հաղորդում է «Արմենպրես»-ը՝ վկայակոչելով արաբական աղբյուրները, մարդու իրավունքների պաշտպանության մասին զեկույցում նշվել է, որ ծայրահեղական կազմակերպությունն իրագործել է երեք միջազգային հանցագործություն՝ ցեղասպանություն, մարդկության հանդեպ հանցագործություն և ռազմական հանցագործություն: «Եզդիների հանդեպ նման գործողությունն ապացուցում է իսլամիստների ցանկությունը' գիտակցաբար ոչնչացնել հնագույն ժողովրդին»,- նշվել է զեկույցում:

Հունվարին ԻՊ-ն ազատ էր աձակել ավելի քան 350 եզդիների, այդ թվում՝ կանանց, երեխաների, ծերերի և նրանց հանձնել քրդական ուժերին: Մյուս կողմից, ահաբեկիչներն ավելի քան 500 եզդի կանանց և երեխաների են առևանգել Սինջարում, որոնց ճակատագիրը մինչև այժմ անհայտ է:

ՄԱԿ-ի մարդու իրավունքների պաշտպանության գերագույն հանձնակատար Զեյդ Ռաադ ալ Հուսեյնը նշել է, որ ԻՊ-ի հանցագործությունները հնարավոր է փոխանցվեն Միջազգային քրեական դատարանին: Նրա խոսքով՝ միջազգային մարդասիրական իրավունքները խախտողները պետք է պատասխանատվության ենթարկվեն:

Հիսուն էջանոց զեկույցում, որն իր մեջ ընդգրկել է 2014թ.-ի հունիսից մինչև 2015թ. ընկած ժամանակահատվածը, ներկայացվել են ավելի քան 100 մարդկանց վկայություններ ԻՊ-ի դաժանությունների մասին: Հանցագործություններն իրականացվել են, մասնավորապես, կրոնական փոքրամասնությունների դեմ: Բազմաթիվ վկայություններ կան սպանությունների, բռնությունների, ոտնձգությունների, երեխաների նկատմամբ սեռական բռնությունների մասին:

2014թ.-ի օգոստոսին ԻՊ-ը Նինվե նահանգում դաժանաբար սպանել էր հարյուրավոր եզդի տղամարդկանց: