Ադրբեջանում մարդու իրավունքների վիճակն անhույս և անբուժելի է. իրավապաշտպան

Բաքվի ծանր հանցագործությունների դատարանի կողմից քաղաքական պատկանելություն չունեցող Սիրաջ Քերիմլիին 6 ամիս ժամկետով ազատազրկելու մասին կայացրած վճիռը ցնցել է Ադրբեջանի իրավապաշտպաններին և հանրությանը: Նա մարտի 16-ին սխալմամբ ձերբակալվել էր մուսավաթական եղբոր՝ Ֆարաջ Քերիմլիի փոխարեն, սակայն, դատարանը հարցը հետաքննելու պայման չէր ստեղծել:

Ինչպես հաղորդում է «Արմենպրես»-ը, Ադրբեջանի Մոնիթորինգային և Մարդու իրավունքների գծով միասնական խմբի ներկայացուցիչ Արզու Աբդուլլաևան այդ առնչությամբ Meydan TV հեռուստաալիքի հետ զրույցում ներկայում Ադրբեջանում մարդու իրավունքների վիճակն անվանել է «շատ վատ, անհույս և անբուժելի»:

Իրավապաշտպանը գտնում է, որ երկրում ոչ միայն շարքային մարդիկ, այլև իշխանության և ժողովրդի միջև միջնորդի դեր խաղացող քաղաքացիական հասարակությունն էլ է մեռած վիճակում: Նրա խոսքով՝ Ադրբեջանում իշխանությունն աշխատում է ծնկի բերել քաղաքացիական հասարակությանը:

«Այդ գործընթացը ոչ մի օգուտ չի կարող բերել: Իրականում, նորմալ երկրներում քաղաքացիական հասարակության ակտիվիստները միջնորդ են հանդիսանում բազմաթիվ խնդիրների լուծման մեջ»,- ասել է նա:

Աբդուլլաևան խոստովանել է, որ Ադրբեջանում իրավապաշտպաններն այնքան անտեսված են, որ իշխանությունները ոչ մի ուշադրություն չեն դարձնում իրենց դիմումներին և առաջարկություններին:

«Միայն կարող եմ հուսալ: Մեր դերն այժմ այն է, որպեսզի հիշեցնենք առկա իրավիճակի մասին»,- ասել է նա: