ՀԱՊԿ-ի միացյալ շտաբը գործնական խաղ է անցկացրել ԻՊ-ի դեմ պայքարի շրջանակներում

Հավաքական անվտանգության պայմանագրի կազմակերպության միացյալ շտաբը դրա պետի՝ գեներալ-լեյտենանտ Ալեքսանդր Ստուդենիկինի ղեկավարությամբ գործնական խաղ է անցկացրել, որի շրջանակներում քննարկել է հավաքական անվտանգության միջոցների ծավալումը «Իսլամական պետության» դեմ պայքարի ֆոնին, տեղեկացնում է «Արմենպրես»-ը՝ հղում անելով ՌԻԱ Նովոստիին:

«Հավաքական անվտանգության տարածաշրջաններում գործնական խաղի նպատակների համար ստեղծվել էր ռազմաքաղաքական և ստրատեգիական իրադրություն, որին համապատասխան՝ ՀԱՊԿ-ի Գյումրիա և Թուրան պայմանական անդամ պետություններում կտրուկ սրվել էր իրադրությունը, սկսել էր աճել լարվածությունը՝ պայմանավորված քաղաքական և սոցիալ-տնտեսական պատճառներով, որոնք ուղեկցվում էին ներքաղաքական պայքարի սրմամբ, սահմանամերձ շրջաններում զինված բախումներով և «Թալիբան» ու «Իսլամական պետություն» ահաբեկչական կազմակերպությունների ռազմաբազաներում պատրաստություն անցած ծայրահեղական տարրերի ու գրոհայինների աստիճանաբար ուժեղացող միջամտությամբ»,- ասված է ՀԱՊԿ-ի կայքում զետեղված հաղորդագրության մեջ:

Մասնավորապես, խաղի մասնակիցները փորձարկել են այդ «երկրներին» ռազմական, ռազմատեխնիկական ու նյութատեխնիկական օգնություն ցուցաբերելու հարցերը:

Մշակվել են պայմանական պետությունների ղեկավարների պաշտոնական դիմումների հիման վրա այդ երկրներին ռազմական, ռազմատեխնիկական ու նյութատեխնիկական օգնություն ցուցաբերելու հարցերը:

Գործնական խաղի մասնակիցները ՀԱՊԿ-ի կանոնադրային մարմինների համար առաջարկություններ են պատրաստել սահմանամերձ շրջաններում հավաքական անվտանգության համակարգի ուժերի և միջոցների ծավալման վերաբերյալ՝ ուժի ցուցադրման և պետական սահմանի պաշտպանությունն ուժեղացնելու նպատակով, նշվում է հաղորդագրության մեջ: