Սինգապուրում սկսվել է առաջին վարչապետ Լի Կուան Յուի հետ հրաժեշտի արարողությունը

Վաղ առավոտից Սինգապուրի հազարավոր բնակիչներ են հավաքվել խորհրդարանի շենքի մոտ, որտեղ սկսվել է երկրի առաջին վարչապետ Լի Կուան Յուի հետ հրաժեշտի արարողությունը, տեղեկացնում է «Արմենպրես»-ը: Հանրապետության հանգուցյալ «հիմնադիր-հորը» հրաժեշտ տալու համար խորհրդարան մուտքը բաց կլինի մինչև մարտի 28-ը, իսկ հաջորդ օրը Սինգապուրի Ազգային համալսարանի մշակութային կենտրոնում տեղի կունենա Լի Կուան Յուի հուղարկավորության պաշտոնական մասը:

Առաջին վարչապետի դին մարտի 25-ի առավոտյան խորհրդարան է տարվել «Իստանա» կառավարական նստավայրից: Տասնյակ հազարավոր սինգապուրցիներ են դուրս եկել քաղաքի փողոցներ՝ դիտելու սգո թափորը: Ինչպես նշում է ՏԱՍՍ-ը, հանդիսաերթն ուղեկցվել է հավաքված բնակիչների «Լի Կուան Յու՛, մեր պապի՛կ, մենք սիրում ենք քեզ» բացականչություններով:

Առաջին վարչապետը վախճանվել է մարտի 23-ին տեղական հիվանդանոցներից մեկում, որտեղ նա գտնվում էր փետրվարի 5-ից:

Լի Կուան Յուն Սինգապուրի վարչապետի պաշտոնն զբաղեցրել է 1959 թվականից: 1990 թվականի նոյեմբերին իշխանությունն ավագ սերնդից կրտսերին հանձնելու իր նախաձեռնած գործընթացի շրջանակներում հեռացել է այդ պաշտոնից: Բայց փաստորեն նա ևս գրեթե 20 տարի կառավարել է երկիրը՝ լուծելով բոլոր կարևորագույն ռազմավարական հարցերը: