Պուտինը կմեռնի Կրեմլում. Գարի Կասպարով

Ռուս ընդդիմադիր Գարի Կասպարովը, ելույթ ունենալով Տիլբուրգի Nexus հոլանդական ինստիտուտում, կոչ է արել խստացնել պատժամիջոցները Ռուսաստանի նկատմամբ և սկսել զենք մատակարարել Ուկրաինա: Այս մասին հայտնում է ավստրիական Die Presse թերթը:

«Եթե Պուտինը զգա, որ մենք թուլություն ենք դրսևորում, ապա նա ավելի հեռուն կգնա»,- հայտարարել է Կասպարովը:

Նրա խոսքով` Պուտինը վտանգ է ներկայացնում Եվրոպայի համար: Նա ասել է, որ Երկրորդ համաշխարհային պատերազմի ավարտից հետո առաջին անգամ Եվրոպայում սահմանները կրկին փոխվել են բռնապետի կողմից: 

«Եթե հիմա Արևմուտքը վճռականորեն հանդես չգա ընդդեմ Պուտինի, ապա վտանգի մեջ կհայտնվի ողջ Ուկրաինան, ինչպես նաև Մերձբալթիկան: Եվրոպան չպետք է անձնատուր լինի»,- ընդգծել է նա:

Զենքի մատակարարումներն Ուկրաինա Պուտինին չեն կանգնեցնի, սակայն գինը նրա համար էլ ավելի կբարձրանա, ասել է Կասպարովը:

Կասպարովը Պուտինին նաև համեմատել է «Իսլամական պետություն» ահաբեկչական խմբավորման հետ: «Եվրոպան հակված է փոխզիջման: Իրավիճակը, երբ հաղթում են երկու մասնակիցներն էլ, միշտ լավ է, սակայն դա անհնար է և՛ ԻՊ-ի, և՛ Պուտինի պարագայում: Նրա միակ նպատակն է իր իշխանության պահպանումը, և մենք պետք է գիտակցենք այդ իրողությունը»,- ընդգծել է նա: Ինչպես ասել է ընդդիմադիրը, «Պուտինը կյանքի մնացած մասը կանցկացնի Կրեմլում»: «Կմահանա նա նույնպես Կրեմլում: Սակայն ինչպես և երբ՝ չգիտեմ»,- ասել է շախմատի աշխարհի չեմպիոնը: