Իրանի միջուկային ծրագրի շուրջ նոր բանակցությունները կկայանան ապրիլի 21-ին

Թեհրանի միջուկային ծրագրի շուրջ «վեցյակի» և Իրանի բանակցությունների հերթական փուլը՝ քաղաքական տնօրենների և փորձագետների մակարդակով, կկայանա ապրիլի 21-ին Իսպանիայում: Այդ մասին, ինչպես տեղեկացնում Է «Արմենպրես»-ը, հայտարարել Է Իրանի ԱԳ նախարար Մոհամադ Ջավադ Զարիֆը:

«Իմ գործընկերները՝ ԵՄ-ի դիվանագիտության փոխղեկավարը և «վեցյակի» մյուս ներկայացուցիչները, կհանդիպեն հաջորդ երեքշաբթի օրը՝ ապրիլի 21-ին, որպեսզի սկսեն գրել ապագա համաձայնագրի նախագիծը»,- Իսպանիա կատարած իր այցի ժամանակ հայտարարել Է Զարիֆը:

Նրա խոսքով՝ «մենք շատ մոտ ենք համաձայնգրի կնքմանը, սակայն դրա տեքստը գրելը և պատժամիջոցների հարցում մյուս կողմի դիրքորոշման փոփոխությունը խիստ կարևոր հարց Է»:

Ավելի վաղ Իրանի նախագահ Հասան Ռուհանին հայտարարել Է, որ չնայած իրանական միջուկային ծրագրի շուրջ ապրիլի սկզբին Լոզանում ձեռք բերված մի շարք պայմանավորվածություններին, Թեհրանի և միջազգային միջնորդների «վեցյակի» առաջիկա բանակցությունները շատ դժվարին են լինելու համապարփակ համաձայնության հասնելու համար:

Իրանը և «վեցյակը» ձգտում են մինչև 2015 թվականի հունիսի 30-ը վերջնական համապարփակ համաձայնության հասնել Թեհրանի միջուկային ծրագրի շուրջ:

«Լոզանի բանակցությունների ընթացքում մենք հասել ենք առանձին պայմանավորվածությունների, և նախքան համապարփակ համաձայնագրին հասնելը դեռ պետք Է շատ դժվարին ճանապարհ անցնենք»,- ասել Է Ռոուհանին:

Նա ձեռք բերված միջանկյալ պայմանավորվածություններն անվանել Է «մեծ քայլ»: Սակայն, նրա խոսքով՝ համապարփակ համաձայնագրի հասնելու համար բանակցությունների բոլոր կողմերը պարտավոր են կատարել իրենց ստանձնած պարտավորությունները:

Իր հերթին Իրանի գերագույն առաջնորդ այաթոլլա Ալի Խամենեին հայտարարել Է, որ Իրանի և միջազգային միջնորդների «վեցյակի» միջև Թեհրանի միջուկային ծրագրի շուրջ շրջանակային համաձայնագիրը չի երաշխավորում, որ վերջնական պայմանագիր կստորագրվի, հաղորդել Է ՌԻԱ Նովոստին:

Լուսանկարը՝ РИА Новости