Հարավային Կորեայում հիշում են «Սևոլ» լաստանավի խորտակման զոհերին

Հարավկորեական «Սևոլ» լաստանավի խորտակման հետևանքով ավելի քան 300 զոհվածների ազգականները մասնակցել են աղետի տարելիցի արարողությանը, տեղեկացնում Է «Արմենպրես»-ը՝ հղում անելով BBC-ին:

Նավի վրայից նրանք ծաղիկներ են նետել ծովի այն վայրը, որտեղ այժմ հատակում ընկած Է լաստանավը:

Ազգականներից շատերը պահանջում են բարձրացնել «Սևոլ»-ը և այնտեղից հանել այն ուղևորների մարմինները, որոնք դեռևս համարվում են անհետ կորածներ:

Հարավային Կորեայի նախագահ Պան Կին Հեին քննադատում են այն բանի համար, որ նա տարելիցի օրն այցով մեկնել Է Հարավային Ամերիկա:

Ավելի վաղ Կորեայի Հանրապետության ծովային գործերի և ձկնորսության նախարարությունը հաղորդել Է, որ «Սևոլ» լաստանավը ծովի հատակից բարձրացնելու համար կպահանջվի ավելի քան 120 մլրդ վոն (110 մլն դոլար): Իսկ ընդամենը, ըստ այս գերատեսչության գնահատումների, ողբերգության բոլոր հետևանքների ամբողջական վերացման համար կպահանջվի ավելի քան 550 մլրդ վոն (504 մլն դոլար):

«Կառավարությունն արդեն 185,4 մլրդ վոն (169,9 մլն դոլար) Է ծախսել որոնողա-փրկարարական գործողությունների, ինչպես նաև տուժածների և զոհվածների ընտանիքներին օգնելու համար»,- նշել են նախարարությունում:

«Սևոլ» մարդատար լաստանավը խորտակվել Է 2014 թվականի ապրիլի 16-ին: Հարավային Կորեայի արդի պատմության մեջ ամենախաշոր ողբերգություններից մեկի զոհ Է դարձել 295 մարդ, որոնցից 250-ը 15-ից մինչև 19 տարեկան դպրոցականներ են: Մինչ այժմ չեն գտնվել ինը մարդու մարմիններ: Ընդամենը վթարի պահին նավի վրա եղել Է 476 մարդ: Լաստանավի խորտակման հետևանքով անհայտ կորածների որոնման գործողությունը դադարեցվել Է 2014 թվականի նոյեմբերին՝ կապված դրա անցկացման բարդության հետ:

Լաստանավի խորտակման գործով մեղադրվում Է 399 մարդ, ձերբակալված են 154-ը: 2014 թվականի նոյեմբերին Հարավային Կորեայի Կվանջու քաղաքի դատարանը «Սևոլի» նավապետին, որն ուղևորի տեսքով առաջիններից մեկն Է լքել խորտակվող նավը, մեղավոր Է ճանաչել արտակարգ իրավիճակում անփութություն դրսևորելու մեջ, ինչը հանգեցրել Է մարդկանց զոհվելու, և նրան դատապարտել Է 36 տարվա բանտային կալանքի: Անձնակազմի ևս 14 անդամներ դատապարտվել են 5-ից մինչև 30 տարվա ազատազրկման:

Լուսանկարը՝ independent.co.uk