Ադրբեջանի ՀՆԱ-ն շարունակում է անկումը

2015 թվականի հունվար-մարտ ամիսներին Ադրբեջանում արտադրվել է 11 մլրդ 525 մլն մանաթի համախառն ներքին արդյունք (ՀՆԱ), ինչը 2014 թվականի նույն ժամանակահատվածի համեմատ, նվազել է 1,8 մլրդ մանաթով կամ 13,6 տոկոսով:

Այս մասին, ինչպես հաղորդում է «Արմենպրես»-ը, «Թուրան» լրատվական գործակալությանը հայտնել են Ադրբեջանի պետական վիճակագրական կոմիտեում:

Ադրբեջանի նավթային հատվածում ՀՆԱ-ն մոտ երկու անգամ կրճատվել է. եթե անցյալ տարվա առաջին եռամսյակում նավթագազային հատվածում արտադրվել էր 6 մլրդ 79 մլն մանաթի հավելյալ արժեք, ապա այս տարվա նույն ժամանակահատվածում արտադրանքը կազմել է 3 մլրդ 652,2 մլն մանաթ:

Նավթարդյունահանման եկամուտների անկման պատճառով ՀՆԱ-ի կառուցվածքում ոչ նավթային հատվածի տեսակարար կշիռը 54,3 տոկոսից բարձրացել է 68,3 տոկոսի (7 մլրդ 872 մլն մանաթ): Ընդ որում, ադրբեջանական կառավարությունն այս փաստը ներկայացնում է որպես ոչ նավթային հատվածի աճ, ինչը չի համապատասխանում իրականությանը:

«Թուրան»-ը նշում է, որ ՀՆԱ-ի արտադրության նվազումը ուղղակիորեն անդրադառնում է նաև բնակչության յուրաքանչյուր շնչին ընկնող նրա արտադրության ցուցանիշների վրա: Այդ պատճառով, Ադրբեջանի Վիճպետկոմն այս տարվանից սկսած' չի հրապարակում այդ տվյալները: 2014 թվականի հունվար-մարտ ամիսներին Ադրբեջանում բնակչության յուրաքանչյուր շնչին ընկնող ՀՆԱ-ն կազմել է 1400 մանաթ կամ 1789 դոլար: Սեփական հաշվարկների հիման վրա «Թուրան»-ը հայտնում է, որ այս տարվա նույն ժամանակահատվածում այդ ցուցանիշը չի գերազանցում 1200 մանաթը կամ 1150 դոլարը:

«Չնայած ՀՆԱ-ի շարունակական անկմանը, Ադրբեջանի առաջնորդ Իլհամ Ալիևը 2015 թվականի առաջին եռամսյակի արդյունքներին և առաջիկա ժամանակաշրջանի խնդիրներին նվիրված կառավարության նիստում գոհունակություն է հայտնել երկրում ստեղծված մակրոտնտեսական իրավիճակի առիթով», -հաղորդում է «Թուրան»-ը: